Europa do të “skuqet” nga rëra e Saharasë, priten re dhe “shi i pistë” në disa rajone

Pas disa ditësh me mot të kthjellët dhe temperatura mbi mesataren sezonale, Europa jugore, duke përfshirë edhe Shqipërinë, pritet të përballet me përkeqësim të ndjeshëm të kushteve atmosferike. Sipas parashikimeve, në ditët në vijim do të shtohen vranësirat dhe reshjet e shiu, të cilat do të shoqërohen me pluhur nga shkretërira e Saharasë. Ky fenomen njihet ndryshe edhe si “shi i pistë”.

Shkak i këtij ndryshimi do të jetë një zonë me presion të ulët që vjen nga Afrika e Veriut, e cila do të aktivizojë erëra të forta nga Saharaja. Këto rryma do të transportojnë drejt Ballkanit, Gadishullit Apenin, por edhe në Spanjë e Francë sasi të mëdha rëre dhe grimcash pluhuri nga shkretëtira afrikane, duke ndikuar drejtpërdrejt në cilësinë e ajrit dhe në reshjet që priten.

Efektet pritet të ndihen që nga dita e diel, më datë 12 prill, kur parashikohen reshje. Ato do të jenë kryesisht “të ndotura”, pasi pluhuri i Saharasë do të bjerë bashkë me shiun dhe do të depozitohet në sipërfaqe, duke lënë gjurmë në makina dhe rrugë. Sipas meteorologëve, ardhja e rërës sahariane lidhet me kalimin e një vorteksi që pritet të forcohet mbi pellgun e Mesdheut, duke tërhequr masa ajri të ngrohtë direkt nga shkretëtira.

Foto ilustruese

Ky kombinim do të sjellë një shtresë të dendur pluhuri në atmosferë, e cila më pas do të bjerë në tokë përmes reshjeve. Ndërkohë, pas temperaturave që në disa zona kanë arritur deri në 27-28 gradë celsius, ndryshimi i parë do të vërehet që të shtunën e 11 prillit, me një rënie të lehtë të temperaturave, kryesisht në zonat veriore. Më pas, nga pasditja e së dielës dhe në fillim të javës tjetër, pritet përkeqësimi më i madh i motit, i shoqëruar me reshje dhe ulje të ndjeshme të temperaturave.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)