Bukureshti mbyll konsullatën ruse pas rrëzimit të dronit rus në Rumani

Tensionet diplomatike mes Rumanisë dhe Rusisë janë rritur ndjeshëm këtë të premte, duke detyruar autoritetet rumune të ndërmarrin masa të menjëhershme kundër përfaqësisë diplomatike ruse në vend.

Situata u përshkallëzua pasi një dron rus u rrëzua mbi një pallat apartamentesh në qytetin Galati, duke plagosur dy persona dhe duke shkaktuar dëme materiale. Pas një mbledhjeje urgjente të Këshillit Suprem të Mbrojtjes Kombëtare, presidenti rumun Nikuşor Dan deklaroi se përgjegjësia për incidentin i takon plotësisht Rusisë.

“Përgjegjësia e plotë i takon Rusisë, një shtet që prej më shumë se katër vitesh zhvillon luftë agresive kundër Ukrainës”, deklaroi presidenti rumun.

Si reagim ndaj ngjarjes, Bukureshti shpalli “non grata” konsullin e përgjithshëm rus në Konstancë dhe vendosi mbylljen e Konsullatës së Përgjithshme të Rusisë në këtë qytet.

Sipas autoriteteve rumune, mjeti fluturues i rrëzuar është identifikuar si një dron rus i tipit “Geran-2”. Hetimet paraprake tregojnë se ai ishte pjesë e një grupi prej 43 dronësh të nisur nga territori rus, por vetëm njëri prej tyre depërtoi në hapësirën ajrore rumune.

Moska reagoi menjëherë ndaj vendimit të autoriteteve rumune. Zëdhënësja e Ministrisë së Jashtme ruse, Maria Zakharova, paralajmëroi se Rusia do të kundërpërgjigjet ndaj masave të ndërmarra nga Bukureshti.

Ndërkohë, autoritetet rumune njoftuan se një tjetër dron i pashpërthyer u gjet në rajonin Basști të qarkut Maramures, pranë kufirit me Ukrainën. Zona është izoluar për arsye sigurie, ndërsa hetuesit po punojnë për të përcaktuar origjinën dhe trajektoren e saktë të mjetit fluturues.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)