Vrau gruan me çekiç dhe fshehu trupin për një javë, shqiptari dënohet me burgim të përjetshëm

Një nga krimet më të rënda që tronditi opinionin publik në Greqi ka marrë fund në sallën e gjyqit. Gjykata e Athinës ka dënuar me burgim të përjetshëm 39-vjeçarin shqiptar Kastriot Cenko, i cili u shpall fajtor për vrasjen e bashkëshortes së tij, Alba Cenko, dhe për përpjekjen për të fshehur gjurmët e krimit.

Vendimi u dha pas një procesi gjyqësor ku gjykata e shpalli fajtor për vrasje me dashje me shumicë votash 6 me 1. Përveç dënimit me burgim të përjetshëm, ai u dënua edhe me 2 vite e 6 muaj burg për mbajtje dhe përdorim armësh.

Sipas prokurorisë, 39-vjeçari veproi me gjakftohtësi dhe planifikoi me kujdes fshehjen e krimit. Prokurori theksoi se i pandehuri nuk tregoi asnjë shenjë pendese, ndërsa viktimën e përshkroi si një nënë dhe grua punëtore, e përkushtuar ndaj rritjes së fëmijëve të saj.

Ngjarja e rëndë ndodhi më 29 nëntor 2024 në zonën e Ampelokipit në Athinë. Sipas hetimeve, Kastriot Cenko goditi bashkëshorten e tij 32-vjeçare me çekiç në kokë dhe më pas fshehu trupin e saj në papafingon e banesës për rreth një javë.

Gjatë kësaj kohe, ai dyshohet se përdori telefonin celular të viktimës për të mashtruar fëmijët e tyre të mitur dhe familjarët e saj, duke krijuar përshtypjen se Alba ishte ende gjallë.

Në mbrojtjen e tij, 39-vjeçari pretendoi se kishte humbur kontrollin dhe se krimi nuk ishte i paramenduar, por gjykata nuk e pranoi këtë argument. Sipas hetimeve, autori prej kohësh dyshonte se bashkëshortja e tradhtonte me një mik të tij, çka besohet se ka qenë motivi që çoi në krimin tragjik.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)