Droni rus goditi pallatin në Rumani, NATO dhe BE reagojnë ashpër: Moska ka kaluar një tjetër vijë të kuqe

Një incident i paprecedentë tronditi Rumaninë dhe ka rritur tensionet mes NATO-s dhe Rusisë, pasi një dron rus goditi një pallat banimi në qytetin Galați, pranë kufirit me Ukrainën, duke plagosur dy persona dhe duke shkaktuar dëme të konsiderueshme materiale. Ngjarja ka nxitur reagime të forta nga aleatët perëndimorë, të cilët e kanë cilësuar incidentin si një pasojë të drejtpërdrejtë të agresionit rus në Ukrainë.

Sipas autoriteteve rumune, droni goditi katin e dhjetë të një pallati banimi, ku shpërtheu e gjithë ngarkesa e tij eksplozive, duke shkaktuar zjarr. Dy persona pësuan lëndime të lehta dhe u dërguan në spital për trajtim mjekësor, ndërsa rreth 70 banorë u evakuuan nga ndërtesa.

Ministria rumune e Mbrojtjes bëri të ditur se droni ishte i tipit rus Geran-2, i njohur gjithashtu si Shahed-136. Pas zbulimit të tij, autoritetet ngritën menjëherë në ajër dy avionë luftarakë F-16, por koha për reagim ishte shumë e kufizuar. Sipas ushtrisë rumune, nga momenti i identifikimit të dronit deri në përplasjen e tij kaluan vetëm katër minuta.

Presidenti rumun Nikușor Dan e cilësoi ngjarjen si incidentin më serioz që ka prekur territorin rumun që nga fillimi i pushtimit rus të Ukrainës në vitin 2022. Ai thirri një mbledhje urgjente të Këshillit Suprem të Mbrojtjes dhe njoftoi masa diplomatike kundër Moskës, përfshirë dëbimin e konsullit rus në Konstancë dhe mbylljen e konsullatës ruse në qytet.

Reagimet ndërkombëtare nuk vonuan. Sekretari i Përgjithshëm i NATO-s, Mark Rutte, deklaroi se “sjellja e pamatur e Rusisë është një rrezik për të gjithë ne”, duke theksuar se aleanca është e gatshme të mbrojë çdo centimetër të territorit të saj. Ndërkohë, presidentja e Komisionit Europian, Ursula von der Leyen, tha se lufta agresive e Rusisë ka kaluar një tjetër vijë të kuqe.

Rumania ka kërkuar nga NATO përshpejtimin e transferimit të sistemeve kundër dronëve, ndërsa autoritetet paralajmërojnë se zona pranë Danubit mbetet veçanërisht e ekspozuar ndaj incidenteve të ngjashme. Sipas Ministrisë së Mbrojtjes së Rumanisë, që nga fillimi i luftës janë regjistruar 47 raste të rënies së fragmenteve të dronëve rusë në territorin rumun, 12 prej tyre vetëm gjatë këtij viti.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)