Izraeli sulmon sërish Gazën, të paktën 31 viktima

Të paktën 31 persona kanë humbur jetën si pasojë e një vale sulmesh ajrore izraelite në disa zona të Rripit të Gazës. Agjencia e Mbrojtjes Civile në Gaza, e drejtuar nga Hamasi, raportoi se mes viktimave kishte gra dhe fëmijë.

Sipas të njëjtave burime, helikopterë luftarakë izraelitë goditën një tendë që strehonte persona të zhvendosur në qytetin jugor të Khan Younis, duke shkaktuar viktima të shumta civile.

Banorët palestinezë i kanë përshkruar këto sulme si më të rëndat që nga fillimi i fazës së dytë të armëpushimit, e ndërmjetësuar në tetor dhe që hyri në fuqi në fillim të këtij muaji.

Nga ana tjetër, Ushtria Izraelite konfirmoi kryerjen e një numri sulmesh, duke deklaruar se ato ishin përgjigje ndaj asaj që e cilësoi si shkelje të marrëveshjes së armëpushimit nga Hamasi.

Në një deklaratë zyrtare, IDF njoftoi se tetë persona të cilësuar si terroristë u identifikuan duke dalë nga tunele nëntokësore në Rafah lindore, zonë ku forcat izraelite janë të dislokuara sipas marrëveshjes së armëpushimit.

Hamasi i ka dënuar ashpër sulmet, duke i cilësuar ato si shkelje të rënda të armëpushimit dhe i ka bërë thirrje Shteteve të Bashkuara të ndërhyjnë menjëherë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)