Avionët britanikë, mision në Lindjen e Mesme, mbrojnë qiejt e Jordanisë dhe Bahreinit

Ministria britanike e Mbrojtjes njoftoi së fundmi se avionët e saj luftarakë kanë rrëzuar një mjet ajror pa pilot që po shkonte drejt Jordanisë dhe kanë interceptuar një tjetër dron që po lëvizte drejt Bahreinit.

Sipas ministrisë, operacionet u kryen si pjesë e angazhimit të Londrës për të mbështetur aleatët në rajon dhe për të parandaluar sulmet ndaj bazave ushtarake dhe infrastrukturës strategjike. Po ashtu, Mbretëria e Bashkuar ka filluar të kryejë edhe fluturime mbrojtëse në mbështetje të Emirateve të Bashkuara Arabe.

Këto masa vijnë në një kohë të rritjes së tensioneve në Lindjen e Mesme, veçanërisht pas përshkallëzimit të konfliktit që lidhet me Iranin dhe aktivitetet e grupeve të armatosura të mbështetura prej tij në rajon.

Londra ka paralajmëruar se kërcënimi nga sulmet me dronë dhe raketa është rritur ndjeshëm në javët e fundit.

Si pjesë e forcimit të pranisë ushtarake, Mbretëria e Bashkuar ka vendosur burime shtesë në Lindjen e Mesme dhe në Mesdheun lindor për të mbrojtur aleatët dhe bazat e saj ushtarake.

Ministria britanike bëri të ditur gjithashtu se helikopterë shtesë të tipit Wildcat kanë mbërritur në Qipro, pasi një bazë ajrore britanike në ishullin mesdhetar u godit nga një sulm me dronë javën e kaluar.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)