Algjeria shpall kolonizimin francez “krim shtetëror”

Parlamenti algjerian ka miratuar njëzëri një ligj që e cilëson kolonizimin francez të Algjerisë nga viti 1830 deri më 1962 si “krim shtetëror”. Vendi afrikan pretendon nga Franca ndjesë zyrtare dhe dëmshpërblime për dëmet materiale dhe morale të shkaktuara gjatë periudhës koloniale.

Ligji, i miratuar nga Asambleja Popullore Kombëtare, përbëhet nga rreth 27 nene dhe i atribuon Francës përgjegjësi ligjore dhe morale për veprimet e saj në Algjeri. Teksti përmend në mënyrë eksplicite krime si eksperimentet bërthamore, ekzekutimet jashtëgjyqësore, torturat fizike dhe psikologjike, si dhe plaçkitjen sistematike të burimeve natyrore dhe kulturore të vendit.

Sipas ligjit, dëmshpërblimi i plotë dhe i drejtë për dëmet e shkaktuara nga kolonizimi është një e drejtë e patjetërsueshme e shtetit dhe popullit algjerian. Po ashtu, parashikohen masa penale kundër glorifikimit ose promovimit të kolonializmit.

Kryetari i Asamblesë, Brahim Boughali, e cilësoi ligjin si një hap për të përcaktuar përgjegjësinë historike të shtetit francez dhe për të mbrojtur kujtesën kombëtare, duke theksuar se nisma nuk synon nxitjen e armiqësisë, por ruajtjen e së vërtetës historike.

Qeveria franceze e ka përshkruar ligjin si një nismë që “dëmton qartësisht vullnetin për të rifilluar dialogun franko-algjerian”, por ka deklaruar se mbetet e hapur për diskutime mbi çështjet historike dhe të kujtesës së përbashkët. Parisi ka theksuar se dialogu do të vazhdojë, duke marrë parasysh edhe prioritetet e përbashkëta në fushat e sigurisë dhe migracionit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)