Kina rrethon sërish Tajvanin, 12 avionë e 7 anijë kërcënojnë ishullin

Tensionet mes Kinës dhe Tajvanit po përshkallëzohen sërish, pasi forcat e armatosura kineze kanë intensifikuar ndjeshëm aktivitetin ushtarak rreth ishullit.

Gjatë 24 orëve të fundit, Pekini ka dërguar 12 avionë luftarakë dhe 7 anije luftarake në drejtim të Tajvanit, duke rritur flotën kineze të pranishme në Ngushticën e Tajvanit që nga fillimi i shkurtit në 27 avionë dhe 25 anije.

Ministria e Mbrojtjes e Tajvanit bëri të ditur se 11 nga avionët kinezë kanë hyrë në Zonën e Identifikimit të Mbrojtjes Ajrore, duke detyruar autoritetet tajvaneze të reagojnë. Taipei ka dislokuar anije patrullimi, avionë luftarakë dhe sisteme raketore për të monitoruar dhe përballuar lëvizjet e forcave kineze.

Këto veprime konsiderohen si pjesë e strategjisë së vazhdueshme të Kinës për të ushtruar presion ushtarak dhe politik ndaj Tajvanit. Partia Komuniste Kineze vijon të pretendojë sovranitet mbi ishullin, pavarësisht faktit se Tajvani funksionon si shtet de facto dhe gëzon njohje diplomatike nga 12 vende në botë, përfshirë Vatikanin dhe disa shtete të Amerikës Latine dhe Paqësorit.

Autoritetet në Taipei e kanë cilësuar këtë rritje të aktivitetit ushtarak si një kërcënim serioz për stabilitetin rajonal, ndërsa komuniteti ndërkombëtar po ndjek me shqetësim zhvillimet në një nga zonat më të ndjeshme gjeopolitike në botë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)