“Thyhet” superkompjuteri i qeverisë kineze, hakerat vjedhin informacionet e rëndësishme

Një haker i paidentifikuar pretendon se ka realizuar një nga vjedhjet më të mëdha të të dhënave në historinë e Kinës, duke marrë mbi 10 petabajt informacione tepër sensitive nga Qendra Kombëtare e Superkompjuterimit në qytetin Tianjin.

Sipas ekspertëve të sigurisë kibernetike, të dhënat e vjedhura përfshijnë dokumente të klasifikuara, skema raketash dhe materiale kërkimore në fusha të ndryshme si inxhinieria hapësinore, bioinformatika dhe simulimet e fuzionit.

Qendra në Tianjin shërben si një nyje kryesore për më shumë se 6,000 institucione në Kinë, përfshirë agjenci të rëndësishme shkencore dhe ushtarake.

Grupi që mban emrin “FlamingChina” publikoi më 6 shkurt një pjesë të të dhënave në një kanal anonim në Telegram, duke pretenduar se dataset-i përmban informacione nga organizata të nivelit të lartë si Korporata e Industrisë së Aviacionit të Kinës, Korporata e Avionëve Komercialë të Kinës dhe Universiteti Kombëtar i Teknologjisë së Mbrojtjes.

Ekspertët që kanë analizuar mostrat e publikuara shprehen se materialet duken autentike, megjithëse origjina e plotë e tyre nuk është verifikuar në mënyrë të pavarur. Sipas tyre, hakeri mund të ketë hyrë në sistem përmes një domeni VPN të komprometuar dhe më pas ka përdorur një rrjet botnet për të nxjerrë të dhënat gradualisht gjatë një periudhe prej disa muajsh, pa u zbuluar.

Shkalla e këtij rrjedhjeje konsiderohet jashtëzakonisht e madhe, pasi një petabajt është i barabartë me 1,000 terabajt. Specialistët vlerësojnë se vetëm shërbimet inteligjente shtetërore kanë kapacitetin për të analizuar një volum kaq të madh informacioni.

Nëse konfirmohet, ky incident mund të nxjerrë në pah dobësi serioze në sigurinë kibernetike të Kinës, në një kohë kur vendi synon të forcojë pozicionin e tij si lider global në teknologji dhe inteligjencë artificiale. Autoritetet kineze nuk kanë dhënë ende një reagim zyrtar lidhur me këtë rast.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)