Avioni humbi 54 metra lartësi në 4 sekonda, një pasagjerë vdiq dhe mbi 100 u plagosën, kompania shkon në gjykatë

Një grup pasagjerësh kanë ndërmarrë veprime ligjore ndaj Singapore Airlines, pas incidentit të rëndë ajror që ndodhi në maj 2024, ku një avion u përball me turbulenca të forta, duke shkaktuar një viktimë dhe mbi 100 të plagosur.

Padia është ngritur nga Bradley Richards, Benjamin Read dhe Alison Read, të cilët ndodheshin në bordin e fluturimit SQ321 drejt Singaporit. Ata kërkojnë dëmshpërblim për dëmtimet fizike dhe traumat e pësuara gjatë incidentit.

Ngjarja ndodhi rreth 11 orë pas nisjes së fluturimit 13-orësh, kur avioni tip Boeing 777-300ER u përfshi nga turbulenca të forta mbi Mianmar. Sipas hetimeve paraprake të Transport Safety Investigation Bureau, avioni humbi rreth 54 metra lartësi në vetëm katër sekonda, një rënie e menjëhershme që shkaktoi panik dhe plagosje të shumta në kabinë.

Si pasojë e incidentit, humbi jetën Geoff Kitchen, 73 vjeç, i cili dyshohet se pësoi atak kardiak gjatë momentit dramatik. Ndërkohë, 104 persona u shtruan në spital, ku 20 prej tyre kishin nevojë për ndërhyrje kirurgjikale ose trajtim intensiv.

Një nga paditësit, Richards, ka deklaruar se u përplas me tavanin e avionit gjatë rënies së papritur, duke pësuar dëmtime serioze në shtyllën kurrizore dhe qafë, si dhe plagë në kokë që kërkuan qepje. Ai ka rrëfyer se përjetimi ishte “si në film”, ndërsa përshkroi skena paniku me pasagjerë të gjakosur dhe fëmijë që bërtisnin.

Sipas të dhënave nga regjistruesit e fluturimit, ndryshimet e menjëhershme të forcës gravitacionale, nga -1.5G në +1.5G, bënë që shumë pasagjerë të hidhen në ajër dhe më pas të përplasen fort në dysheme, duke shkaktuar dëmtime të rënda, veçanërisht për ata që nuk kishin vendosur rripat e sigurimit.

Kompania ajrore ka deklaruar më herët se pasagjerët me dëmtime të lehta do të kompensohen me 10 mijë dollarë, ndërsa për rastet më të rënda janë parashikuar pagesa paraprake deri në 25 mijë dollarë, si dhe kompensime të personalizuara në vijim. Gjithashtu, janë rimbursuar biletat për të gjithë pasagjerët.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)