Akulli gjigant shkëputet pranë stacionit gjerman në Antarktidë, studiuesit mbeten pa karburant dhe strehim

Një incident i pazakontë ka goditur një stacion kërkimor në Antarktida, pasi një masë gjigante akulli u shkëput dhe u largua në det bashkë me kontejnerë që transportonin furnizime jetike për studiuesit.

Ngjarja ndodhi pranë stacionit kërkimor gjerman Neumayer Station III, i cili u përball me një stuhi të fuqishme bore në janar. Si pasojë, një platformë e madhe akulli u shkëput dhe mori me vete shtatë kontejnerë që ndodheshin mbi të.

Në kontejnerë ndodheshin pajisje speciale, bateri, bombola gazi dhe rreth 9,500 litra naftë dimërore. Njëri prej tyre shërbente edhe si vendstrehim për ekipet që eksploronin rajonin polar.

Pas përfundimit të stuhisë, studiuesit zbuluan se masa e akullit ishte larguar drejt Deti Weddell. Akullthyesi kërkimor gjerman “Polarstern” e lokalizoi platformën rreth 140 kilometra larg, ndërsa u organizua një operacion shpëtimi me helikopter për të rikuperuar një pjesë të furnizimeve. Megjithatë, misioni u ndërpre pasi akulli u bë tepër i paqëndrueshëm.

Një muaj më vonë, platforma e akullit nuk u pa më në imazhet satelitore dhe besohet se është copëtuar plotësisht. Autoritetet dyshojnë se kontejnerët janë fundosur në det, duke ngritur shqetësime serioze për ndotje mjedisore, sidomos për shkak të karburantit që transportonin.

Ndërkohë, shkencëtarët paralajmërojnë se shkrirja e përshpejtuar e akullnajave në Antarktidë mund të rrisë nivelin e deteve më shpejt nga sa ishte parashikuar. Studiuesit norvegjezë kanë zbuluar se ujërat më të ngrohta po shkrijnë akullin poshtë sipërfaqes deri në 10 herë më shpejt se normalisht, duke kërcënuar stabilitetin e gjithë rajonit polar.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)