Zbulohet objekti “fantazmë” 4,900 vite dritë larg, “një dritare në universin e errët”

Shkencëtarët kanë zbuluar një lloj krejtësisht të ri objekti astronomik, të cilin e kanë quajtur “Cloud-9”, duke e cilësuar si një “dritare drejt universit të errët”. Ky objekt i pazakontë ndodhet rreth 14 milionë vite dritë larg Tokës dhe përbëhet nga një re gjigante gazi, e pasur me materie të errët, por pa asnjë yll brenda saj.

Në qendër të Cloud-9 ndodhet një bërthamë e madhe dhe kompakte me hidrogjen neutral, me një diametër rreth 4.900 vite dritë, më shumë se 1.000 herë më e madhe se distanca mes Tokës dhe yllit më të afërt, Proxima Centauri. Pavarësisht se përmban sasi të mëdha “karburanti” për formimin e yjeve, vëzhgimet e realizuara me Teleskopin Hapësinor Hubble kanë konfirmuar se Cloud-9 nuk përmban asnjë yll.

Sipas astronomëve, kjo e bën Cloud-9 një lloj “galaktike të dështuar”, një mbetje nga universi i hershëm që nuk arriti kurrë të formojë yje. Objekti i përket një kategorie teorike të quajtur Reionization-Limited H I Cloud, e cila deri më tani kishte qenë pothuajse e pamundur të vërtetohej në praktikë.

Dr. Andrew Fox nga Agjencia Hapësinore Evropiane shpjegon se prova kryesore për praninë e materies së errët është vetë madhësia e resë. “Një strukturë e tillë ka nevojë për një forcë gravitacionale që ta mbajë të bashkuar. Meqë nuk ka yje dhe gazi nuk mjafton, materie e errët duhet të jetë përgjegjëse,” thotë ai. Sipas vlerësimeve, Cloud-9 përmban rreth pesë miliardë masa diellore materie të errët.

Zbulimi është jashtëzakonisht i rëndësishëm, sepse ofron një pamje unike të fazave më të hershme të formimit të galaktikave. Cloud-9 u identifikua fillimisht tre vite më parë nga teleskopi kinez FAST, por vetëm tani, falë Hubble, u konfirmua se është plotësisht pa yje.

Studiuesit besojnë se zbulimi i Cloud-9 nënkupton se objekte të tjera të ngjashme mund të ekzistojnë edhe në “lagjen” tonë kozmike, duke hapur një kapitull të ri në kuptimin e lindjes së galaktikave dhe rolit të materies së errët në univers.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)