Krijohet ChatGPT Shëndetësia, mjekët marrin garanci nga… Inteligjenca Artificiale

“OpenAI” ka lançuar një version të ri të “ChatGPT”, të quajtur “ChatGPT Shëndetësia”, që do ti mundësojë përdoruesve të ngarkojnë kartelat e tyre mjekësore dhe të konsultohen online me inteligjencën artificiale për gjendjen e tyre shëndetësore. Megjithatë, kompania “OpenAI” siguroi se ky sistem nuk ka për qëllim të zëvendësojë mjekët dhe nuk do të bëjë diagnoza.

Në një njoftim të publikuar, kompania tha se gjatë dy viteve të fundit ka bashkëpunuar me mbi 260 mjekë aktivë nga 60 shtete dhe fusha të ndryshme të mjekësisë, për të kuptuar si mund të japin përgjigje të dobishme dhe të sigurta në lidhje me shëndetin. “‘ChatGPT Shëndetësia’ është projektuar për të ofruar informacion dhe për të mbështetur përdoruesit në menaxhimin e shëndetit të tyre, por nuk ka për qëllim të zëvendësojë asnjëherë mjekët”, theksoi “OpenAI”.

Një tjetër shqetësim i ngritur lidhet me privatësinë e të dhënave shëndetësore të përdoruesve. Për këtë arsye, “OpenAI” ka theksuar se “ChatGPT Shëndetësia” do të përdorë protokolle të avancuara të sigurisë dhe privatësisë, duke përfshirë sisteme të kriptimit dhe mekanizma të izolimit të bisedave. Kjo do të garantonte që informacionet shëndetësore të mbeten private dhe të ndara nga të dhënat e tjera të përdoruesve.

Ky aplikacion do të jetë i dobishëm për udhëzime të përgjithshme, siç janë këshillat për ushqim, regjim ushtrimesh dhe përgatitja për ekzaminime mjekësore. Megjithatë, “ChatGPT Shëndetësia” nuk është i dizajnuar për të bërë diagnoza apo për të trajtuar sëmundje. Synimi është të lehtësohet qasja me shërbimet shëndetësore dhe për të mbështetur pacientët në menaxhimin e informacionit shëndetësor.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)