Gjendet kutia e rrallë me vegla për vrasjen e vampirëve

Një muze në qytetin polak të Wrocław-it ka shtuar në koleksionin e tij një objekt të rrallë dhe të pazakontë. Bëhet fjalë për vegla të fillimit të shekullit XX, që shërbenin për vrasjen e vampirëve. Ato qëndronin të fshehura brenda asaj që dukej si një kuti e zakonshme violine.

Objekti u zbulua në një dyqan sendesh antike në Varshavë nga studiues të Universitetit të Mjekësisë në Wrocław. Ata e blenë kutinë, për ta ekspozuar më pas në Muzeun e Mjekësisë Ligjore të qytetit.

Foto nga web

Sipas kuratorit të muzeut, Dr. Jędzrej Siuta, kompleti është autentik dhe i përket fillimit të viteve 1900, periudhë në të cilën spikaste interesi i madh për vampirët, i nxitur nga romani Dracula, i botuar në vitin 1897 nga Bram Stoker. “Kulmi i këtij interesi ishte mes viteve 1900 dhe 1920”, tha ai.

Ndryshe nga shumica e ekzemplarëve të njohur, të prodhuar kryesisht në Gjermani, Francë ose Angli, ky komplet është me origjinë polake, çka e bën edhe më të rrallë. Brenda kutisë ndodhen objekte të ndryshme që, sipas besimeve popullore, shërbenin për të larguar ose shkatërruar vampirët.

Foto nga web

Aty përfshiheshin kryqe prej bronzi, një libër lutjesh, dy shishe - njëra me ujë të bekuar dhe tjetra me një lëng ende të paidentifikuar - një shandan, një pasqyrë, brirë dreri, thika të veshura me argjend, gozhdë dhe çekiçë me maja metalike.

Argjendi besohej se largonte të keqen, bindje që mund të ketë lidhje me vetitë e tij antibakteriale gjatë epidemive të murtajës. Komplete të ngjashme janë shitur në ankande ndërkombëtare për shuma të larta, të cilat arrinin në mbi 19.000 euro, megjithëse muzeu nuk ka bërë publik çmimin e blerjes.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)