"Nuk e di kurrë sa kohë ke", 77-vjeçari nis udhëtimin e tij rreth botës me një motoçikletë

Për të nisur një udhëtim rreth botës nuk është kurrë vonë. Këtë e tregon më së miri rasti i 77-vjeçarit Stephen Barnett, i cili u nis nga Madridi në një udhëtim prej 80,000 km duke kaluar nëpër 27 vende, me qëllim që të bëhej personi më i vjetër që udhëton rreth botës me motoçikletë.

Një udhëtim ambicioz i jetës ka filluar për 77-vjeçarin amerikan, ish-mësuesi që ia ka kushtuar pjesën më të madhe të jetës udhëtimeve me motor. Që kur mori biçikletën e tij të parë në moshën 15 vjeç, ai nuk ka pushuar kurrë së eksploruari botën, duke vizituar tashmë pothuajse 80 vende.

Foto: Facebook/Steven Barnett

Sot, duke u nisur nga Madridi, ai nisi një aventurë të re që parashikon një itinerar prej mbi 80,000 kilometrash dhe që kalon nëpër 27 vende. Udhëtimi i tij përfshin, ndër të tjera, ndalesa në Francë, Itali, Greqi, Turqi, por edhe destinacione më të largëta si Australia dhe Peruja.

Udhëtimi, i cili pritet të zgjasë rreth një vit, u vendos pas një problemi serioz shëndetësor, pasi Barnett pësoi një atak në zemër vitin e kaluar, gjë që e bëri të rivlerësonte prioritetet e tij.

"Nuk e di kurrë sa kohë ke", tha ai në një intervistë me CNN, duke shpjeguar se nuk donte ta shtynte më tej ëndrrën e tij.

Foto: Facebook/Steven Barnett

Frymëzimi për rrugëtimin e ri erdhi nga një artikull i CNN Travel rreth Bridget Mccutchen, e cila kishte vendosur si qëllim të bëhej gruaja më e re që ngiste një motoçikletë përreth botës. Historia e saj e bëri Barnett të mendonte se ai mund të realizonte një rekord të ngjashëm, por për një moshë më të madhe.

Pasi zbuloi se askush nuk e mbante titullin specifik, ai kontaktoi Librin e Rekordeve Botërore Guinness për të paraqitur një propozim për të krijuar një kategori të re rekordesh.

Për t’u vlerësuar për këtë arritje, 77-vjeçari duhet të përmbushë disa kushte. Ndër të tjera, ai duhet të përdorë të njëjtën motoçikletë gjatë gjithë rrugës dhe të mos udhëtojë me asnjë mjet tjetër, përveç rasteve kur ngarja e një motoçiklete është e pamundur. Përveç kësaj, duhet të regjistrojë dhe dokumentojë çdo fazë të udhëtimit për të vërtetuar se i plotëson të gjitha kërkesat.

Foto: Facebook/Steven Barnett

Për udhëtimin e tij, ai zgjodhi një ‘Suzuki DR650’, të cilin e bleu tetorin e kaluar dhe e modifikoi posaçërisht për kërkesat e misionit. Motoçikleta është e pajisur me një rezervuar më të madh karburanti, në mënyrë që të mund t'i përballojë orët e gjata të udhëtimit dhe kushtet e ndryshme të rrugës.

Ai pranon se tani duhet të jetë më i kujdesshëm. "Nuk mund ta ngas motorin siç mundja kur isha 50 vjeç", pranon ai.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)