Vlen 200 milionë dollarë, banka jep kredi duke përdorur djathin “parmigiano” si garanci

Në veri të Italisë, një bankë ka krijuar një sistem të veçantë financimi ku djathi përdoret si kolateral për kredi. “Credito Emiliano” e trajton djathin Parmigiano Reggiano pothuajse si flori, madje duke e përdorur atë si garanci për financimin e fermerëve dhe prodhuesve.

Banka aktualisht ruan rreth 430 mijë rrota djathi parmigiano, me një vlerë totale që përllogaritet në rreth 200 milionë dollarë. Ky djathë kërkon zakonisht nga dy deri në tre vite për t’u pjekur dhe për të arritur cilësinë përfundimtare për treg.

Kjo periudhë e gjatë e maturimit krijon vështirësi për prodhuesit, pasi ata kanë miliona dollarë produkte që nuk mund t’i shesin menjëherë, ndërkohë që duhet të paguajnë për lopët, punëtorët dhe shpenzimet e fermës.

Për të zgjidhur këtë problem, fermerët mund të përdorin djathin e ri si garanci për të marrë një kredi. “Credito Emiliano” u jep atyre deri në 80 për qind të vlerës së produktit paraprakisht, duke i ndihmuar bizneset të vazhdojnë aktivitetin.

Gjatë kohës që kredia është aktive, rrotat e djathit ruhen në depo të specializuara me teknologji të avancuar, ku kontrollohen dhe mirëmbahen nga ekspertë. Në rast se një fermer nuk arrin të shlyejë kredinë, banka mund ta shesë djathin e pjekur në treg dhe të rikuperojë paratë e saj, shpesh edhe me fitim.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)