Fluksi në kufi për festa, Muçaj: Po punojmë me kapacitete të plota për të shmangur radhët

Drejtorët e Departamenteve për Kufirin dhe Migracionin dhe për Sigurinë Publike, Saimir Muça dhe Dhimitraq Ziu zhvilluan një inspektim në pikën kufitare të Kakavijës për të verifikuar zbatimin e masave për garantimin e rendit dhe sigurisë publike gjatë periudhës së fundvitit dhe ditëve  të para të Vitit të Ri 2026!

Në një prononcim për mediat, zyrtari i policisë Saimir Muçaj u shpreh se janë vënë në gatishmëri të gjitha kapacitetet për të shmangur radhët në kufi dhe për të parandaluar kalimin e sendeve të jashtëligjshme.

“Janë shtuar sportelet dhe numri i punonjësve të Policisë, veçanërisht në Pikat e Kalimit Kufitar me Greqinë dhe në pikat e tjera me fluks të lartë, ku prej dy javësh punohet me kapacitet të plotë logjistik dhe njerëzor.

Po ashtu, është intensifikuar bashkëpunimi dhe shkëmbimi i informacionit me vendet fqinje, në mënyrë të veçantë me Policinë Kufitare greke, si dhe është aplikuar procedura e lehtësuar e kalimit kufitar aty ku ka qenë e nevojshme.

Gjatë kësaj periudhe është shënuar një rritje e qarkullimit ndërkufitar rreth 10.5% krahasuar me vitin e kaluar, jo vetëm të shtetasve shqiptarë, por edhe të vizitorëve të huaj.

Shërbimet e Policisë Kufitare dhe Migracionit janë të përkushtuara për të garantuar një kalim sa më të lehtë dhe të sigurt për bashkëkombasit tanë dhe vizitorët e huaj, si dhe për parandalimin dhe goditjen e kriminalitetit ndërkufitar gjatë kësaj periudhe festive”, tha Muçaj.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)