U shkarkua nga vetingu, gjyqtari Metalla fiton në Strasburg, shteti do t'i paguajë 26 mijë euro dëmshpërblim

Gjykata Evropiane e të Drejtave të Njeriut i ka dhënë të drejtë ish-gjyqtarit Ervin Metalla, duke konstatuar shkelje të Nenit 8 të Konventës Evropiane të të Drejtave të Njeriut në lidhje me shkarkimin e tij nga procesi i vetingut në Shqipëri.

Vendimi i Strasburgut vlerëson se ndërhyrja ndaj Metallës, konkretisht shkarkimi nga detyra, nuk ishte në përpjesëtim me qëllimet legjitime të ndjekura nga autoritetet shqiptare. Sipas Gjykatës, organet e vetingut nuk arritën të provonin në mënyrë bindëse se vazhdimi i detyrës së tij si gjyqtar ishte i papranueshëm.

Ish-gjyqtari u shkarkua në korrik të vitit 2018 nga Komisioni i Pavarur i Kualifikimit, vendim i cili u la në fuqi më pas nga Kolegji i Posaçëm i Apelimit. Shkarkimi u bazua kryesisht në problematika të konstatuara në kriterin e pasurisë, ku Metalla u akuzua për përfitim të një kredie të butë në kundërshtim me kushtet ligjore dhe për nënshkrim kontratash të konsideruara fiktive.

Megjithatë, Strasburgu pranoi se edhe pse këto veprime mund të ngrinin pikëpyetje mbi etikën e një gjyqtari, ato nuk arrinin nivelin që të justifikonin masën më të rëndë disiplinore – largimin përfundimtar nga sistemi i drejtësisë.

Për këtë arsye, Gjykata Evropiane urdhëroi shtetin shqiptar të dëmshpërblejë Metallën me 20,400 euro për dëmin pasuror, 6,000 euro për dëmin moral dhe 6,000 euro për shpenzimet ligjore.

Ervin Metalla ka pasur një karrierë të gjatë në sistemin e drejtësisë shqiptare, duke shërbyer si gjyqtar në Durrës që prej vitit 2001, më pas si kryetar i kësaj gjykate dhe që nga viti 2013 si gjyqtar në Apelin e Tiranës. Ai ka mbajtur gjithashtu postin e kryetarit të Unionit të Gjyqtarëve dhe aktualisht ushtron profesionin e avokatit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)