Milani i var shpresat te një 40-vjeçar, Modric i befason të gjithë me rikuperimin

Një paraqitje zhgënjyese në Mapei Stadium ka vënë në vështirësi Milanin në garën për një vend në Champions League, ndërsa mungesa e Luka Modric është ndjerë ndjeshëm në fushë.

Trajneri Massimiliano Allegri nuk e fshehu pakënaqësinë pas ndeshjes, duke e cilësuar performancën si më të dobëtën e sezonit. Zëvendësuesi i Modric, Jashari, zhgënjeu sërish dhe u bë protagonist negativ në golin e parë të Domenico Berardi, duke humbur topin në një moment vendimtar.

Kjo humbje e ka vënë në rrezik kualifikimin e kuqezinjve në Champions, me ekipin që tani ka nevojë për gjashtë pikë në tre ndeshjet e mbetura për të siguruar objektivin.

Ndërkohë, shpresat janë kthyer te Modric, i cili ndodhet jashtë fushave pas një operacioni për frakturë në zigomë, të pësuar në sfidën ndaj Juventus. Edhe pse fillimisht u mendua se sezoni i tij kishte përfunduar, mesfushori kroat ka nisur punën për rikthim të shpejtë.

Ai është paraqitur në Milanello për të filluar stërvitjen individuale dhe synon, edhe pse me vështirësi, të jetë gati për ndeshjen e fundit ndaj Cagliari në San Siro. Rikthimi i tij mund të jetë vendimtar për objektivin Champions.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)