Bordi i Transparencës rrit çmimin e naftës sërish: Akciza do të ulet vetëm kur çmimi të shkojë 220 lekë

Bordi i Transparencës ka publikuar vendimin më të fundit për çmimet e karburanteve në Shqipëri, duke përcaktuar tarifat e reja tavan për naftën dhe benzinën.

Sipas vendimit të marrë në mbledhjen e datës 13 maj 2026, çmimi maksimal i shitjes me pakicë për naftën do të jetë 201 lekë për litër, ndërsa në shitjen me shumicë do të tregtohet jo më shumë se 189 lekë për litër.

Ndërkohë, benzina do të shitet me një çmim maksimal prej 187 lekësh për litër në tregun me pakicë dhe 175 lekë për litër në tregun me shumicë.

Bordi bëri të ditur se çmimet e reja do të hyjnë në fuqi sot, më 13 maj, duke nisur nga ora 18:00 dhe do të mbeten në fuqi deri në mbledhjen e ardhshme, ku pritet të reflektohen lëvizjet e reja të tregut ndërkombëtar të hidrokarbureve.

Në njoftimin zyrtar, autoritetet paralajmëruan operatorët e tregtimit të karburanteve se zbatimi i vendimit është i detyrueshëm, ndërsa në rast shkeljesh do të merren masa deri në pezullim të aktivitetit.

Bordi sqaroi gjithashtu se ulja e akcizës në nivelin 80% zbatohet vetëm kur çmimi i naftës kalon 220 lekë për litër ose benzina 200 lekë për litër. Meqë çmimet aktuale janë nën këtë kufi, akciza do të vijojë të zbatohet në nivelin e plotë, 100%.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)