Policia e gjeti duke shitur fishekzjarrë, i mituri godet efektivët

Një i mitur, 15 vjeçar, është proceduar penalisht pasi akuzohet për veprat penale “Goditja për shkak të detyrës” dhe “Shkelja e rregullave mbi lëndët plasëse dhe djegëse”, pas një ngjarjeje të regjistruar ditën e sotme në rrugën “Besim Cera”.

Sipas njoftimit zyrtar të Policisë, gjatë kontrolleve në terren, shërbimet policore kanë konstatuar të miturin duke shitur lëndë piroteknike, aktivitet i cili kryhej në kundërshtim me ligjin. Menjëherë pas evidentimit të rastit, efektivët kanë ndërhyrë për ndalimin e aktivitetit të paligjshëm dhe shoqërimin e 15-vjeçarit në ambientet e Policisë.

Gjatë momentit të shoqërimit, i mituri ka kundërshtuar veprimet e punonjësve të Policisë dhe, sipas autoriteteve, i ka goditur ata. Për këtë arsye, ndaj tij janë kryer veprimet procedurale përkatëse dhe çështja i është referuar Prokurorisë për veprime të mëtejshme.

Policia bën me dije se kontrollet do të vijojnë edhe në ditët në vijim, me qëllim parandalimin e tregtimit të paligjshëm të lëndëve piroteknike dhe garantimin e rendit e sigurisë publike.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)