Venezuela liron të huajt që akuzoheshin se do vrisnin Maduron, mes tyre dhe një shqiptar

Media çeke ka raportuar se një grup të burgosurish të huaj, të akuzuar nga autoritetet venezueliane për përfshirje në një komplot për vrasjen e ish-presidentit Nicolas Maduro, janë liruar nga burgu. Mes të liruarve ka edhe një shtetas shqiptar.

Sipas informacioneve zyrtare, grupi përbëhej nga shtetas të Shqipërisë, Çekisë, Irlandës, Rumanisë, Gjermanisë, Ukrainës dhe Holandës. Ata ishin arrestuar në vitin 2024, me akuza që, sipas diplomacive përkatëse dhe organizatave të të drejtave të njeriut, konsideroheshin politike dhe të pabazuara.

Ambasada shqiptare në Brazil ka konfirmuar se shtetasi shqiptar me inicialet J.N. është liruar dhe aktualisht ndodhet pranë përfaqësisë së “Kryqit të Kuq” në Venezuelë. Ai po pret marrjen e autorizimit zyrtar për t’u kthyer në Shqipëri.

Burime diplomatike bëjnë me dije se Ambasada shqiptare është në kontakt të vazhdueshëm si me autoritetet vendase, ashtu edhe me familjarët e të liruarit. Familja ka arritur të komunikojë telefonikisht me të menjëherë pas lirimit, duke konfirmuar gjendjen e tij shëndetësore.

Lirimi i të burgosurve erdhi pas disa javësh negociatash intensive diplomatike, të ndërmjetësuara nga vende të ndryshme evropiane.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)