16 muaj pas hekurave, lirohet ish-deputeti socialist Jurgis Çyrbja

Ish-deputeti i Partisë Socialiste e Shqipërisë, Jurgis Çyrbja, është liruar nga burgu pas vendimit të gjykatës për shuarjen e masës së sigurisë “arrest në burg”, 16 muaj pas arrestimit të tij me urdhër të SPAK mbrëmjen e 20 tetorit 2024.

Çyrbja u deklarua fajtor për korrupsion në zgjedhje, përkrahje të autorit të krimit dhe nxjerrje të sekretit shtetëror. Fillimisht ai u dënua me 3 vite burgim, por në aplikim të gjykimit të shkurtuar dënimi iu ul në 2 vite heqje lirie.

Vendimi përfundimtar u dha nga Gjykata e Posaçme kundër Korrupsionit dhe Krimit të Organizuar më 3 nëntor 2025, duke e shpallur fajtor për veprat penale të lidhura me korrupsionin zgjedhor dhe zbulimin e informacioneve sekrete.

Sipas hetimeve, në tetë episode të ndryshme gjatë periudhës maj 2020 – mars 2021, Çyrbja është vënë në dijeni të të dhënave nga sistemi TIMS për persona të shpallur në kërkim, si dhe të informacioneve sekrete të Drejtorisë së Përgjithshme të Policisë së Shtetit. Këto të dhëna, që përfshinin edhe plane operacionale për kapjen e personave të kërkuar për krim të organizuar, veçanërisht në Qarkun e Durrësit, dyshohet se janë transmetuar tek persona në kërkim, duke u mundësuar shmangien e arrestimit.

Prokuroria ka argumentuar se, në këmbim të votave dhe mbështetjes elektorale, Çyrbja ka përdorur funksionin e tij si deputet për të siguruar dhe shpërndarë informacione sekrete në favor të grupeve kriminale.

Në kohën e kryerjes së veprave penale, ai ushtronte mandatin si deputet i Partisë Socialiste dhe u rizgjodh edhe në legjislaturën 2021–2025. Ai dha dorëheqjen nga mandati më 9 tetor 2024, pak ditë para arrestimit.

Në të njëjtin proces, Altin Hajri u dënua me 3 vite burgim, ndërsa Ahmet Masha me 2.6 vite burg.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)