“Nuk e kemi bojkotuar Parlamentin”, Berisha kundër “Smart City”: Rrezikohet privatësia, çmime 30-fish mbi tregun

Partia Demokratike nuk do ta bojkotojë Parlamentin. Konfirmimi u dha nga kreu i saj, Sali Berisha, që në konferencën për media njoftoi se demokratët do të jenë pjesë e seancës plenare në sesionin e ri parlamentar. “Do jemi aty për të qenë zëri i qytetarëve. Nuk kemi bojkotuar parlamentin”, tha Berisha.

Ai reagoi edhe rreth qëndrimit të Taulant Ballës, me kreun e grupit socialist që në Konferencën e Kryetarëve kërcënoi opizitën se nëse nuk merr pjesë në dy Komisionet për reformat, zgjedhoren dhe territorialen, atëherë puna do të vijojë pa ata. “Nuk kam përgjigje përveç asaj që shqiptarët do i japin Taos së famshëm të krimit dhe Edi Ramës më 24 janar. Ata kanë aneksuar parlamentin dhe qytetarët shqiptarë do thonë fjalën e tyre”, tha kreu i PD-së.

Berisha u ndal edhe te “Smart City Albania”, duke akuzuar projektin e ri të qeverisë, që me mbështetjen e Emirateve të Bashkuara Arabe synon instalimin e mbi 5 mijë kamerave në 20 qytetet kryesore shqiptare. Sipas kreut të demokratëve, kjo iniciativë kërcënon privatësinë e qytetarëve, ndërsa denoncoi çmimet e fryra për realizimin e saj, me kosto deri në 30-fish më të lartë.

“Nuk monitoron vetëm lëvizjet e qytetarëve, por regjistron edhe fytyrat, emocionet. Privatësia e çdo individi kthehet në informacion shtetëror, i cili mund të jetë i qasshëm për krimin e organizuar”, tha ai. “Për ta realizuar, kamera e trupit të policit është blerë 15,700 euro, kur në treg kushton 1,000 apo 1,500 euro. Kamera rrugore është paguar 52 mijë euro, kur jashtë kushton 2,000. Çmimet e ofruara për realizimin e projektit janë nga 10 deri në 30-fishin e çmimeve që këto aparatura kanë në treg”, përfundoi Berisha.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)