“Ballukun e larguan si heroinë”, Berisha paralajmëron: Do të ketë largime të tjera

Kryetari i Partisë Demokratike, Sali Berisha gjatë bashkëbisedimit me qytetarët në rrjetet sociale ka komentuar largimin nga detyra i ish-ministres së Infrastrukturës dhe Energjisë, njkohësisht edhe zv.kryeministre, Belinda Balluku. Ai ironizoi mënyrën si u paraqit largimi i saj, pavarësisht akuzave për korrupsion dhe abuzim me detyrën.

“Lubi Balluku mblodhi ministrinë dhe me duartrokitje e mallëngjime doli para tyre si heroinë e jo delinkuente e zezë që është. E patë si me tekstin e përgatitur nga Rama thoshte se nuk ka kryer asnjë vepër, veç sukseseve të mëdha dhe nuk ka bërë korrupsion. Këto janë zhvillime dramatike. Kushtrim për të gjithë qytetarët të bashkohemi për largimin sa më parë të Ramës si një rrezik kombëtar”, u shpreh Berisha.

Kreu i demokratëve foli për marrëdhënien mes Ballukut dhe kryeministrit Edi Rama, duke akuzuar për bashkëpunime të hershme, teksa paralajmëroi largime të tjera nga qeveria. “Siç është e qartë, në të gjitha veprimet, Lubia si një njeri i rrahur me vaj dhe uthull e ka skllav Ramën sepse aktiviteti vjedhës, korruptiv i tyre është edhe 25-vjeçar”, deklaroi ai.

Berisha shtoi: “Ajo ka qenë asistentja kryesore në të gjitha vjedhjet e Ramës në bashki dhe sipas raportit të OSBE-së, shifra ka arritur në 200 milionë euro në bankat offshore, akuzë që Rama nuk e kundërshtoi dot kurrë. Lidhja e Lubi Ballukut me Edi Ramën është lidhje në krim. Ky është gjithë problemi, prandaj ai nuk e lëshon dot. Dhe do ketë edhe koka të tjera”.

Në fund, Berisha u ndal edhe te largimi i ish-ministres për Eeropën dhe Punët e Jashtme, Elisa Spiropali. Sipas tij, ajo ishte në dijeni të këtij zhvillimi disa javë para se vendimi të bëhej publik nga kryeministri Rama. “Në çdo takim, çështja e parë ishte çështja ‘Balluku’, Spiropali shprehej në mënyrë evazive që drejtësia të mos pengohet dhe të gjitha këto nga shoqëruesit e saj i shkonin Ramës dhe Lubisë. Unë e pata paralajmëruar se e mora vesh”, tha kreu i PD-së.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)