Kuvendi thërret Këshillin e Mandateve, PD kundërshton nismën e Peleshit: Akt i paprecedent

Grupi Parlamentar i Partisë Demokratike ka reaguar pas njoftimit të Kryetarit të Kuvendit, Niko Peleshi për mbledhjen e Këshillit për Rregulloren, Mandatet dhe Imunitetin, e cila është parashikuar të zhvillohet më 15 prill 2026. Mbledhja lidhet me shqyrtimin e kërkesës së SPAK për arrestimin e ish-zv.kryeministres, Belinda Balluku.

Sipas opozitës, zhvillimi i kësaj procedure në këtë moment, pa u zbardhur ende vendimi i Gjykatës Kushtetuese, përbën një akt të paprecedent dhe bie ndesh me parimet e shtetit të së drejtës. Demokratët theksojnë se një veprim i tillë injoron autoritetin e Gjykatës Kushtetuese dhe cenon besimin e publikut në vendimet e saj.

Foto ilustruese

Në reagimin zyrtar, PD e cilëson njoftimin e Kryetarit të Kuvendit si antikushtetues, duke argumentuar se procedura po zhvillohet në një moment kur ende nuk janë sqaruar përfundimisht efektet e vendimeve të mëparshme të Gjykatës Kushtetuese. “Kryetari i Kuvendit ka ftuar deputetët në mbledhje, pa pritur zbardhjen e vendimit të Gjykatës Kushtetuese. Kjo praktikë bie ndesh me nenin 132 të Kushtetutës dhe provon edhe njëherë vullnetin e mazhorancës për të injoruar zbatimin e vendimeve të Gjykatës Kushtetuese”, thuhej në reagimin e Grupit Parlamentar të demokratëve.

Në reagimin e publikuar, opozita i referohet edhe rendit të ditës së mbledhjes, i cili parashikon ndryshime në Rregulloren e Kuvendit të Republikës së Shqipërisë. Sipas saj, projektvendimi përmban dispozita që janë shfuqizuar më herët nga Gjykata Kushtetuese, duke ngritur shqetësime për respektimin e vendimeve të saj dhe funksionimin e shtetit ligjor.

REAGIM I GRUPIT PARLAMENTAR TË PD-së:

Kryetari i Kuvendit ka njoftuar sot thirrjen e mbledhjes së Këshillit për Rregulloren, Mandatet dhe Imunitetin për në datë 15.04.2026, ora 12:00, me rend dite: “Shyrtimi i projektvendimit “Për disa ndryshime dhe shtesa në vendimin e Kuvendit nr. 166, datë 16.12.2004, “Për miratimin e Rregullores së Kuvendit të Republikës së Shqipërisë”, të ndryshuar”.

Ky njoftim bëhet në kushtet kur projektvendimi përkatës përfshinë dispozita që janë shfuqizuar njëzëri nga Gjykata Kushtetuese, duke injoruar autoritetin e kësaj të fundit dhe në shkelje të parimeve bazë të funksionimit të shtetit ligjor.

Secili qytetar i Republikës së Shqipërisë dhe partnerët tanë ndërkombëtar kujtojnë se për 3 muaj, Kryetari i Kuvendit z. Niko Peleshi refuzoi të thërriste mbledhjen e Këshillit për Rregulloren, Mandatet dhe Imunitetin për të shqyrtuar kërkesën e SPAK për autorizimin e arrestimit të ish-Zëvendëskryeministres Belinda Balluku, me arsyetimin se po priste zbardhjen e vendimit të Gjykatës Kushtetuese lidhur me një kërkesë të Kryeministrit që nuk kishte asnjë lidhje me çështjen që shqyrtonte Kuvendi i Shqipërisë.

Ndërkohë që në rastin konkret, edhe pse rendi i ditës është qartësisht i lidhur me zbardhjen e vendimit të Gjykatës Kushtetuese, të njoftuar në datën 23 Shkurt 2026, Kryetari i Kuvendit ka ftuar deputetët në mbledhje, pa pritur zbardhjen e vendimit të Gjykatës Kushtetuese. Kjo praktikë bie ndesh me nenin 132 të Kushtetutës dhe provon edhe njëherë vullnetin e mazhorancës për të injoruar zbatimin e vendimeve të Gjykatës Kushtetuese.

Duke e konsideruar këtë akt si të paprecedent, Grupi Parlamentar i Partisë Demokratike, dënon me forcë provokimin e Kryetarit të Kuvendit z. Niko Peleshi dhe e konsideron njoftimin e bërë prej tij për të mbledhur Këshillin për Rregulloren, Mandatet dhe Imunitetin, ende pa u njoftuar vendimi i zbardhur i Gjykatës Kushtetuese, si një veprim antikushtetues, që cënon parimet bazë të shtetit ligjor dhe cenon besimin e publikut tek autoriteti i padiskutueshëm i vendimeve të Gjykatës Kushtetuese.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)