“Pastrimi i parave po varfëron shqiptarët”, Jorida Tabaku denoncon arsyet e rënies së euros

Rënia e fortë e euros në këmbimin valutor të tregut vendas ka nxitur reagimin e ashpër të deputetes Jorida Tabaku. Përfaqësuesja e Partisë Demokratike paralajmëroi pasoja serioze për ekonominë shqiptare, prodhimin vendas, si edhe për standardin e jetesës së qytetarëve.

Nëpërmjet një video në rrjetet sociale, Tabaku thekson se monedha europiane ka zbritur në nivele historikisht të ulëta, duke u zhvlerësuar me afro 40 për qind përgjatë viteve të fundit. Sipas saj, rënia e kursit të këmbimit ndihet në mënyrë të drejtpërdrejt në jetën e përditshme.

“Zhvlerësimi i euros po ndikon drejtpërdrejt në çmime, në eksporte, në punësim dhe në mbijetesën e bizneseve shqiptare. Çdo retorikë për nxitjen e eksporteve është e pavlefshme, për sa kohë ekonomia po goditet nga ky fenomen”, tha deputetja demokrate.

Tabaku e lidhi këtë zhvillim me praninë e parasë informale dhe pastrimin e parave në ekonomi. Këta faktorë po deformojnë tregun dhe po krijojnë një realitet të rremë ekonomik.

“Ky ndikim po shkon drejtpërdrejt në xhepin e qytetarëve dhe po sjell pasoja katastrofike. Nuk ka asnjë mekanizëm që ta rikuperojë dëmin që po i bëhet sot ekonomisë nga pastrimi i parave. Nuk është thjesht një çështje kursi këmbimi, por një problem serioz që po thellon varfërinë, po dëmton prodhimin vendas dhe po rrezikon stabilitetin afatgjatë të ekonomisë shqiptare, në mungesë të një ndërhyrjeje të fortë institucionale”, theksoi Tabaku.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)