Thellohet skandali në futbollin turk, masa dhe për 224 futbollistë të tjerë

Skandali që ka tronditur futbollin turk vijon të marrë përmasa edhe më të mëdha dhe ka tërhequr vëmendjen e të gjithë opinionit sportive evropiane.

Çështja e përfshirjes së lojtarëve dhe arbitrave në një skemë bastesh të paligjshme, e cila ka shpërthyer prej disa javësh, vazhdon të prodhojë zhvillime të reja, duke thelluar krizën në futbollin turk.

Komiteti Disiplinor i Federatës Turke të Futbollit ka marrë vendime të reja ndëshkuese, duke dënuar gjithsej 224 futbollistë dhe 24 gjyqtarë. Masat disiplinore janë pjesë e hetimeve që po zhvillohen për manipulim ndeshjesh dhe përfshirje në baste të paligjshme.

Sipas të dhënave zyrtare, nga 224 futbollistët e ndëshkuar, 197 janë lojtarë amatorë, ndërsa pjesa tjetër aktivizohet në nivele më të larta të futbollit turk. Ndërkohë, pesë nga 24 gjyqtarët e dënuar ushtrojnë aktivitetin e tyre në divizionin e parë të kampionatit, fakt që e bën edhe më shqetësuese përmasën e skandalit.

Dënimet e vendosura variojnë nga pezullime 45-ditore, deri në ndalime 1-vjeçare nga çdo aktivitet futbollistik, në varësi të shkallës së përfshirjes dhe shkeljeve të konstatuara.

Rreth një muaj më parë, mbi një mijë lojtarë, së bashku me disa gjyqtarë dhe zyrtarë klubesh, u dërguan në gjykatë për t’u marrë në pyetje, ndërsa në mesin e të ndëshkuarve kishte edhe emra të njohur.

Një nga rastet më të bujshme ishte ai i Eren Elmali të Galatasarayt, i cili u përjashtua edhe nga Kombëtarja turke, duke sinjalizuar ashpërsinë e masave të marra nga institucionet sportive.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)