Partizani i heq fitoren Vorës në fund

Një ndeshje me shumë emocione dhe kthesa ka dhuruar përballja mes Vorës dhe Partizanit në kuadër të Kategoria Superiore, ku gjithçka u vendos vetëm në minutat e fundit. Të kuqtë arritën të shmangin humbjen, duke barazuar 2-2 në një sfidë ku vendasit ishin shumë pranë një fitoreje të rëndësishme.

Takimi i zhvilluar në Vorë nisi me shumë energji nga vendasit, të cilët treguan dëshirë dhe agresivitet në lojë. Skuadra e Vorës arriti të kalojë në avantazh falë golit të Luis Felipe, duke entuziazmuar tifozët vendas.

Pak më vonë, vendasit goditën sërish. Chibuike Ohaegbulam dyfishoi shifrat, duke e çuar rezultatin në 2-0 dhe duke e vendosur Partizanin në një situatë të vështirë.

Megjithatë, reagimi i të kuqve erdhi para përfundimit të pjesës së parë. Doumbia arriti të shkurtojë diferencën, duke rikthyer shpresat për skuadrën kryeqytetase dhe duke e mbajtur ndeshjen të hapur për pjesën e dytë.

Në fraksionin e dytë të lojës, Partizani u përpoq të gjente golin e barazimit dhe krijoi disa raste, por goli i shumëpritur erdhi vetëm në momentet e fundit të sfidës, kur një autogol i vendasve bëri që rezultati të fiksohej në 2-2.

Pas këtij barazimi, skuadra e drejtuar nga trajneri Kërnaja mban vendin e katërt në renditje me 43 pikë, ndërsa Vora mbetet në vendin e tetë me 27 pikë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)