Gara e Katalonjës 'e mallkuar' për Moto GP, aksidente të frikshme të Marquez dhe Zarco

Një nga garat më kaotike dhe tensionuese të sezoneve të fundit në MotoGP përfundoi me triumfin e pilotit italian Fabio Di Giannantonio, i cili fitoi Çmimin e Madh të Katalonjës pas një të diele të mbushur me aksidente të rënda, ndërprerje dhe momente paniku në pistën e Montmeló.

E diela në pistën e Circuit de Barcelona-Catalunya u shndërrua në një makth për shumë pilotë, pasi gara u ndërpre dy herë me flamur të kuq për shkak të aksidenteve të rënda.

Incidenti i parë përfshiu Alex Marquez, i cili u përplas me motorin KTM të Pedro Acosta, pasi ky i fundit kishte mbetur i ndalur në vijën kryesore për shkak të një problemi mekanik. Ducati i ekipit Gresini u shkatërrua plotësisht nga impakti, ndërsa Marquez mbeti i vetëdijshëm gjatë ndërhyrjes së shpejtë të stafit mjekësor.

Situata u përkeqësua edhe më shumë pas rinisjes së dytë të garës, kur në kthesën e parë ndodhi një tjetër aksident masiv. Më i dëmtuari nga përplasja ishte Johann Zarco, i cili mbeti i bllokuar me motorin e Francesco Bagnaia-s dhe më pas u transportua në spital për kontrolle mjekësore.

Menjëherë pas kalimit të vijës së finishit, protagonisti i garës nuk e fshehu emocionin, por as shqetësimin për gjendjen e rivalëve të përfshirë në incidentet dramatike.

“Jam i lumtur dhe i shqetësuar për pilotët. Shpresoj që Alex të jetë mirë dhe shpresoj që të gjithë të jenë mirë”, deklaroi Di Giannantonio pas fitores.

Piloti italian foli edhe për kushtet e rrezikshme të garës, duke pranuar se atmosfera në pistë ishte jashtëzakonisht e tensionuar. “Jemi në një situatë të rrezikshme, por jam shumë i lumtur për veten time sepse e kemi kërkuar këtë rezultat për një kohë të gjatë.”

Nga muri i bokseve reagoi edhe legjenda e MotoGP-së Valentino Rossi, i cili nuk e fshehu ankthin gjatë momenteve dramatike të garës.

“O Zot, sa e frikshme! Ishte e vështirë, ishte e tmerrshme”, tha Rossi.

Më pas, italiani vlerësoi paraqitjen dhe karakterin e pilotit të tij, duke e cilësuar fitoren si një moment të madh për ekipin.

“Diggia ishte një kafshë, një rikthim shumë i fortë, ai ishte tepër i shpejtë dhe e kaloi siç duhej. Jemi shumë krenarë për të gjithë ekipin. Ishte një fitore e madhe dhe emocionale.”

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)