Kaosi në “Celtic Park”, Hearts kërkon titullin në tavolinë pas pushtimit të fushës

Humbja 3-1 ndaj Celtic në ndeshjen e fundit të kampionatit dukej se kishte mbyllur garën për titullin kampion në Skoci për Hearts, por polemikat e mëdha që shpërthyen pas fishkëllimës së fundit mund ta çojnë çështjen në tavolinat e federatës.

Hearts pretendon se sfida në “Celtic Park” nuk u përfundua kurrë zyrtarisht, pas pushtimit masiv të fushës nga tifozët vendas në momentin e golit vendimtar të Callum Osmand.

Në një reagim të ashpër, klubi i Hearts dënoi atë që e quajti “një turp për futbollin skocez”, duke theksuar se lojtarët dhe stafi i klubit janë përballur me “abuzime serioze fizike dhe verbale” si në fushë, ashtu edhe jashtë saj.

“Pushtimi në fushë shkaktoi një fund kaotik dhe askush nuk dukej se e dinte nëse ndeshja ishte përfunduar apo jo”, thuhet në deklaratën e klubit.

Sipas Hearts, situata në stadium u bë aq kërcënuese, sa stafi dhe skuadra u detyruan të largoheshin menjëherë nga impianti, pa zhvilluar as prononcimet tradicionale pas ndeshjes.

“Duke pasur parasysh atmosferën kërcënuese brenda stadiumit, i gjithë stafi ynë nuk kishte alternativë tjetër veçse të largohej menjëherë. Siguria e stafit tonë ishte fokusi ynë kryesor gjatë këtyre skenave të papranueshme”, vijon reagimi.

Foto: AP/ Andrew Milligan

Klubi skocez konfirmoi gjithashtu se po bashkëpunon me Policinë e Skocisë për të hetuar incidentet, ndërsa kërkoi nga autoritetet sportive të marrin “veprimet më të forta të mundshme” për të mbrojtur sigurinë e lojtarëve dhe integritetin e garës.

Hearts theksoi se lojtarëve iu mohua edhe mundësia për të falënderuar tifozët e tyre pas ndeshjes, ndërsa vlerësoi skuadrën dhe trajnerin Derek McInnes për sezonin e zhvilluar.

“Asnjëri prej tyre nuk i meritonte skenat e turpshme që u zhvilluan”, përfundon deklarata e klubit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)