Në Turqi nuk ka festë për 1 maj, por protestë, qindra të arrestuar

Dita Ndërkombëtare e Punëtorëve në Turqi është shoqëruar me protesta dhe tensione, ndërsa qindra persona janë arrestuar në Stamboll.

Sipas organizatave për të drejtat e njeriut dhe mediave lokale, të paktën 550 persona janë shoqëruar nga policia në zona të ndryshme të qytetit, pasi grupe protestuesish tentuan të mblidheshin në SHESHIN Taksim për të shënuar 1 Majin. Autoritetet kishin vendosur masa të rrepta sigurie dhe e kishin bllokuar sheshin për çdo tubim.

Shoqata e Juristëve Bashkëkohorë bëri të ditur se ndërhyrjet policore u zhvilluan në disa zona, ndërsa protestuesit, përfshirë punëtorë, përfaqësues të partive politike dhe organizata joqeveritare, u ndaluan teksa marshonin me sloganin “Taksimi është sheshi i punëtorëve”.

Gjatë ndërhyrjeve, u përdor edhe gaz lotsjellës, ndërsa mes të ndaluarve ishte edhe aktivisti sindikal Başaran Aksu. Reagim të fortë pati edhe kreu i Partisë së Punëtorëve të Turqisë, Erkan Baş, i cili deklaroi se autoritetet “po konfirmojnë sërish represionin dhe kufizimin e lirive”, duke bërë thirrje për lejimin e tubimeve paqësore.

Foto: AP/Khalil Hamra

Vëmendje të madhe ka tërhequr edhe një video e shpërndarë në rrjetet sociale, ku shihet ndërhyrja e policisë ndaj një të riu, i cili gjatë arrestimit mban grushtin e ngritur në ajër, duke u kthyer në simbol të protestave.

Ndërkohë, në Ankara, sindikatat dhe organizatat zhvilluan tubime paqësore, duke marshuar drejt sheshit Tandogan.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)