Sistemi i ri digjital i regjistrimit, Franca pezullon kontrollet në pikën kufitare në Dover

Autoritetet franceze kanë pezulluar përkohësisht kontrollet shtesë kufitare në pikën kufitare të Doverit, pasi mijëra pushues që udhëtonin drejt Francës u përballën me radhë të gjata dhe temperatura të larta gjatë fundjavës.

Situata ka shkaktuar vonesa të konsiderueshme për udhëtarët që prisnin të kalonin Kanalin Anglez. Sipas autoriteteve të portit, disa pasagjerë kanë pritur deri në dy orë për të hyrë në terminal dhe edhe mbi dy orë të tjera për procedurat e kontrollit kufitar.

Problemet lidhen me përgatitjet për sistemin e ri digjital të Bashkimit Europian, të njohur si EES, i cili do të zbatohet për qytetarët jo-anëtarë të BE-së. Sistemi do të përfshijë skanime biometrike, si gjurmët e gishtërinjve dhe njohja e fytyrës.

Megjithëse pajisjet e reja nuk janë aktivizuar ende në Dover, zyrtarët francezë po regjistronin manualisht të dhënat e udhëtarëve, duke shkaktuar ngadalësim të madh të procesit. Pas reagimeve dhe trafikut të rënduar, kontrollet shtesë u pezulluan përkohësisht për të lehtësuar situatën.

Drejtori i portit të Doverit, Doug Bannister, deklaroi se mbi 8 mijë automjete priteshin të kalonin gjatë së shtunës dhe pranoi se përpunimi i ngadaltë kishte krijuar probleme.

Ndërkohë, edhe shërbimi hekurudhor LeShuttle raportoi vonesa të konsiderueshme mes Folkestone dhe Calais.

Situata u përkeqësua edhe nga vala e të nxehtit që ka përfshirë Britaninë e Madhe. Temperaturat arritën deri në 28.4 gradë Celsius, ndërsa meteorologët paralajmërojnë se gjatë ditëve në vijim mund të kalojnë edhe 30 gradët.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)