Europa merr “flakë”: Valë e pazakontë të nxehti, me temperatura deri në 15°C mbi normalen

Europa po përballet me një valë të pazakontë të nxehti për muajin maj, me temperatura që këtë fundjavë pritet të jenë shumë më të larta se mesatarja klimatike në pjesën jugperëndimore, perëndimore dhe pjesërisht në Europën Qendrore. Sipas parashikimeve meteorologjike, në disa zona temperaturat do të rezultojnë deri në 15 gradë Celsius mbi normat afatgjata për këtë periudhë të vitit.

Shkaku kryesor i kësaj situate është një sistem i fuqishëm i presionit të lartë atmosferik i vendosur mbi kontinentin europian, i cili po tërheq masa të nxehta ajrore nga Afrika e Veriut. Fenomeni njihet si “kupola e nxehtësisë”.

Ky mekanizëm krijon kushte ku ajri në qendër të sistemit zbret drejt sipërfaqes dhe ngrohet më tej, duke penguar formimin e reve dhe duke lejuar depërtimin maksimal të rrezatimit diellor. Si pasojë, nxehtësia grumbullohet pranë tokës dhe intensifikohet gradualisht.

Meteorologët paralajmërojnë se temperaturat mund të kalojnë 30°C në shumë vende të Europës Perëndimore dhe Qendrore, ndërsa në jugperëndim të Spanjës pritet të arrijnë deri në 38°C. Ekspertët paralajmërojnë gjithashtu se gjatë ditëve në vijim mund të thyhen rekorde të shumta ditore temperaturash, duke e kthyer këtë episod në një nga valët më të hershme dhe më intensive të të nxehtit të regjistruara ndonjëherë në muajin maj në Europë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)