Janë dyfishuar prej vitit 1990, çrregullimet mendore kanë prekur 1.2 miliardë njerëz

Një studim ndërkombëtar ka ngritur alarmin mbi rritjen dramatike të çrregullimeve mendore në botë, duke treguar se numri i personave të prekur është dyfishuar që nga viti 1990. Sipas kërkimit të realizuar nga Instituti për Metrikat dhe Vlerësimin e Shëndetit, në bashkëpunim me Universitetin e Queensland, rreth 1.2 miliardë njerëz në mbarë globin vuajnë aktualisht nga probleme të shëndetit mendor.

Studimi analizoi të dhëna nga 204 vende dhe territore gjatë periudhës 1990-2023, duke përfshirë 12 kategori të ndryshme çrregullimesh mendore. Sipas ekspertëve, çrregullimet mendore janë tashmë shkaku kryesor i paaftësisë në nivel global, duke tejkaluar sëmundjet kardiovaskulare, kancerin dhe problemet muskulo-skeletore. Ndër diagnozat më të përhapura renditen ankthi dhe depresioni i rëndë, të cilat kanë shënuar rritje të ndjeshme pas pandemisë së Covid-19.

Të dhënat tregojnë se që nga viti 2019, rastet e depresionit të rëndë janë rritur me rreth 24%, ndërsa çrregullimet e ankthit janë shtuar me mbi 47%, duke arritur kulmin në vitet pas pandemisë. Në vitin 2023, çrregullimet mendore shkaktuan rreth 171 milionë vite jete të humbura për shkak të paaftësisë, duke përfaqësuar mbi 17% të të gjitha viteve të jetuara me aftësi të kufizuar në botë.

Damian Santomauro, një nga autorët e studimit, deklaroi se rritja e rasteve lidhet jo vetëm me efektet afatgjata të pandemisë, por edhe me faktorë si varfëria, pasiguria, abuzimi, dhuna dhe dobësimi i lidhjeve sociale. Sipas studiuesve, situata kërkon investime më të mëdha në sistemet e shëndetit mendor dhe zgjerim të aksesit në trajtim për grupet më të rrezikuara.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)