Si na mashtron truri me çmimet në ofertë

Në është çmimi 1.11 euro, një paketë familjare, apo një ofertë speciale, supermarketet përdorin shumë truke psikologjike për t’i bërë çmimet të duken më tërheqëse sesa janë në të vërtetë. Edhe pse shumica prej nesh i njohim këto strategji, shpesh nuk arrijmë t’u rezistojmë. Sipas ekspertit të çmimeve Dr. Sebastian Voigt, bashkë-administrator i kompanisë “hy Consulting”, shpesh nuk është çmimi real ai që na shtyn të blejmë, por ndjesia se kemi gjetur një super ofertë.

Efekti i 1.11 euros

Një nga strategjitë më të përdorura është vendosja e çmimeve të quajtura “prag”, si p.sh. 9.99 euro, që për shumicën duket shumë më lirë se 10 euro, edhe pse diferenca është vetëm 1 cent. “Truri i lexon çmimet nga e majta në të djathtë, shifër pas shifre – dhe 9 duket automatikisht më i lirë se 10,” shpjegon Voigt.

Ai shton se çmimet e “rrumbullakëta” ose të lehta për t’u perceptuar, si 1.11 euro, përpunohen më shpejt nga truri sesa çmime më të ndërlikuara si 1.08 euro. Çmimet që kërkojnë më shumë kohë për t’u kuptuar mund të aktivizojnë më shumë “qendrën e dhimbjes” në tru, duke e bërë blerjen më pak të këndshme.

Birra, “karrem” për të shpenzuar

Produktet shumë të lira nuk janë rastësi. Shpesh ato shërbejnë si “karrem” për të “hapur shportën”, pra për të futur klientin në dyqan dhe për ta nxitur të blejë më shumë. Një shembull klasik është birra, e cila shpesh reklamohet me ulje.

Studimet kanë treguar se kur birra promovohet, rritet edhe probabiliteti që klientët të blejnë produkte të tjera, si p.sh. pampersat. Kjo strategji lidhet me një analizë të të dhënave në SHBA në vitin 1992, ku u vu re se midis orës 17:00 dhe 19:00, klientët kryesisht meshkuj blinin shpesh birrë dhe pampersa së bashku.

Foto: AP

Zbritjet nuk janë aq të mëdha

Edhe ofertat klasike shpesh luajnë me perceptimin. Një tabelë si: “Tani 2.49€ në vend të 2.99€” duket si kursim i madh. Në realitet, kursimi është vetëm 50 cent, që përbën rreth 17% ulje. Por numri 50 duket më i madh dhe më bindës sesa 17%, edhe pse matematikisht janë e njëjta gjë.

Paketimi familjar jo gjithmonë më i liri

Paketat e mëdha ose “familjare” krijojnë idenë se janë gjithmonë më ekonomike. Shpesh kjo është e vërtetë, por jo gjithmonë. Voigt thotë se rastet kur një paketë e madhe del më e shtrenjtë se ajo e vogël janë të rralla, por mund të ndodhin.

“Oferta” pranë markave të shtrenjta

Edhe vendosja e produkteve në rafte është pjesë e strategjisë. Kur një produkt i lirë i supermarketit vendoset pranë një marke shumë më të shtrenjtë, ai duket automatikisht më i favorshëm. Supermarketet preferojnë të shesin markat e tyre, sepse përfitojnë përqindje më të lartë fitimi, edhe pse çmimi është më i ulët.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)