“Jemi në rrugën drejt BE”, Rama në Seul: Dikur Shqipëria ishte ‘Koreja e Veriut’ e Europës

Gjatë pjesëmarrjes në Konferencën Aziatike të Lidershipit në Seul, kryeministri Edi Rama deklaroi se në të kaluarën Shqipëria ishte “Koreja e Veriut e Europës”, duke iu referuar periudhës së izolimit komunist. Ai theksoi se vendi ka marrë një drejtim krejt tjetër, atë të integrimit në Bashkimin Europian.

Pas më tepër se dy dekadave, Rama kujtoi vizitën e tij të parë në kryeqytetin koreano-jugor, kur ishte në detyrën e kryetarit të Bashkisë së Tiranës. Ai e cilësoi transformimin e Koresë së Jugut si një dëshmi të fuqishme se historia nuk përcakton domosdoshmërisht fatin e një kombi.

Kryeministri theksoi se gadishulli korean përfaqëson një nga shembujt më të qartë në botë të dy realiteteve të kundërta: Korenë e Jugut, që u shndërrua në simbol të zhvillimit dhe modernizimit dhe Korenë e Veriut, që mbeti simbol i izolimit, frikës dhe sundimit të forcës. Duke e lidhur këtë krahasim me Shqipërinë, Rama deklaroi se vendi ynë ka kaluar një kapitull të dhimbshëm izolimi, por sot është orientuar drejt demokracisë, reformave dhe integrimit europian.

Foto: Edi Rama/Facebook

“Gjatë një kapitulli të dhimbshëm, Shqipëria ishte Koreja e Veriut e Europës, por sot po ecën në një rrugë tjetër, jo të lehtë, por thelbësisht ndryshe. Një rrugë drejt ndërtimit të institucioneve, modernizimit demokratik dhe Bashkimit Europian”, u shpreh Rama. Ai shtoi se Shqipëria po përpiqet të dëshmojë se institucionet demokratike mund të ndërtohen edhe në vende ku historia ka qenë pengesë.

Në fjalën e tij, Rama përmendi gjithashtu se, edhe pse larg gjeografikisht, vende si Shqipëria e ndjejnë afër përvojën e Koresë së Veriut përmes kujtesës historike të izolimit, ndërsa e konsideroi Korenë e Jugut si një shembull frymëzues të rindërtimit dhe zhvillimit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)