“Muri” 8 mijë kilometra për të bllokuar shkretëtirën e Saharasë

Një nga projektet më ambicioze mjedisore në botë po merr formë në Afrikë, ku 11 shtete kanë bashkuar forcat për të ndërtuar një “mur” natyror prej 8 mijë kilometrash me pemë, shkurre dhe bimësi, me synimin për të frenuar zgjerimin e Shkretëtirës së Saharasë.

Projekti i njohur si “Muri i Madh i Gjelbër” shtrihet nga Xhibuti deri në Senegali dhe synon të rikuperojë 100 milionë hektarë tokë deri në vitin 2030. Nisma u prezantua fillimisht në vitin 2007, por mori shtysë të re pas samitit të Parisit në vitin 2021, ku Bashkimi Europian, Banka Botërore dhe Bashkimi Afrikan premtuan mbi 14 miliardë dollarë financim.

Megjithatë, ritmi i projektit mbetet i ngadaltë. Sipas të dhënave të Bashkimit Afrikan, deri në fund të vitit 2024 është realizuar vetëm 18% e objektivit.

Etiopia konsiderohet vendi me progresin më të madh, pasi ka rikuperuar mbi 15 milionë hektarë tokë duke përdorur teknika natyrore për mbrojtjen e bimësisë ekzistuese. Ndërkohë, Senegali ka mbjellë rreth 12 milionë pemë, ndërsa Nigeria ka restauruar pesë milionë hektarë në veri të vendit.

Shkencëtarët paralajmërojnë se Sahara po zgjerohet me 48 deri në 60 kilometra çdo vit për shkak të rritjes së temperaturave dhe thatësirave. Nëse projekti dështon, deri në 216 milionë njerëz mund të detyrohen të largohen nga shtëpitë e tyre deri në vitin 2050 për shkak të ndryshimeve klimatike.

Megjithatë, iniciativa po përballet edhe me probleme serioze politike. Grushtet e shtetit dhe konfliktet e armatosura në vende si Mali, Burkina Faso dhe Nigeri kanë ngadalësuar punimet dhe larguar organizatat ndërkombëtare nga terreni. Për këtë arsye, Bashkimi Afrikan pritet të shtyjë afatin final të projektit deri në vitin 2035.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)