Netanyahu pas sulmit në Iran: Faleminderit Trump, iranianët të marrin në dorë fatin e tyre

Kryeministri izraelit Benjamin Netanyahu komentoi sulmin e përbashkët të Tel Avivit dhe Uashingtonit ndaj Teheranit, duke theksuar se ky veprim synon të krijojë kushte që populli iranian të marrë në dorë fatin e tij.

“Prej 47 vitesh regjimi i ajatollahëve thërret ‘Vdekje Izraelit’ dhe ‘Vdekje Amerikës’. Ka derdhur gjakun tonë, ka vrarë shumë amerikanë dhe ka masakruar popullin e tij. Nuk mund të lejohet që të pajiset me armë bërthamore, ky do të ishte kërcënim për të gjithë njerëzimin”, deklaroi Netanyahu.

Ai falënderoi presidentin amerikan Donald Trump për “udhëheqjen historike” dhe shtoi se operacioni i përbashkët do të ndihmojë në çlirimin e iranianëve nga “tirania”. “Është koha që të gjithë komponentët e popullit iranian: persianët, kurdët, azerët, baluçët dhe ahuazit të çlirohen nga tirania dhe të sjellin liri e paqe në Iran”.

Në një apel për qytetarët izraelitë, Netanyahu tha: “Ndiqni udhëzimet e Komandës së Frontit të Brendshëm. Në ditët në vijim, duhet të tregojmë durim dhe forcë shpirtërore. Së bashku do të rezistojmë, së bashku do të luftojmë dhe së bashku do të sigurojmë përjetësinë e Izraelit”. Sipas tij, operacioni i Izraelit dhe Shteteve të Bashkuara shërben për të zhdukur kërcënimin ekzistencial që paraqet regjimi i terrorit në Iran.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)