Ndikimi i luftës në Iran, Spanja heq taksat për energjinë elektrike

Qeveria spanjolle pritet të ndërmarrë masa të reja për të përballuar rritjen e çmimeve të energjisë dhe karburanteve, si pasojë e tensioneve në Lindjen e Mesme. Kryeministri Pedro Sánchez do të prezantojë një plan që synon lehtësimin e barrës financiare për qytetarët, përmes uljes së disa taksave mbi energjinë elektrike.

Sipas planit, qeveria synon të ulë TVSH-në në faturat e energjisë elektrike, të heqë taksën 7 për qind mbi prodhimin e energjisë elektrike dhe të reduktojë Tatimin Special mbi Energjinë Elektrike. Aktualisht, ky i fundit është në nivelin 5.11 për qind, pasi ishte ulur në mënyrë të përkohshme në 0.5 për qind gjatë vitit 2021 për të frenuar rritjen e çmimeve.

Megjithatë, ministri i Ekonomisë, Carlos Cuerpo, ka bërë të ditur se ulja e çmimeve të karburanteve nuk është aktualisht prioritet, ndryshe nga periudha e fillimit të luftës në Ukrainë, kur u aplikua një zbritje prej 20 centësh për litër.

Qeveria spanjolle thekson se këto masa synojnë të mbrojnë qytetarët dhe sektorët më të prekur nga rritja e kostove të energjisë dhe lëndëve të para, si plehrat kimike. Në të njëjtën kohë, Sánchez ka vënë theksin te rëndësia e energjive të rinovueshme, duke argumentuar se investimet në këtë sektor kanë ndihmuar Spanjën të mbajë çmime më të ulëta të energjisë krahasuar me vende të tjera evropiane.

Megjithatë, ekspertët fiskalë kanë shprehur dyshime për efektivitetin e këtyre masave. Sipas tyre, uljet e përgjithshme të TVSH-së mund të përfitojnë më shumë shtresat me të ardhura të larta dhe të ndikojnë në rritjen e inflacionit, duke i bërë këto politika më pak efikase në afatgjatë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)