“Mrekullia logjistike” e sauditëve, flota me 3.500 kamionëve anashkalon bllokadën e Hormuzit

Mbyllja e Ngushticës së Hormuzit ka detyruar Arabinë Saudite të aktivizojë një plan emergjent transporti për të shmangur bllokimin e rrugëve detare dhe për të mbajtur në funksion eksportet strategjike, sidomos të plehrave kimike. Sipas raportimeve të “Wall Street Journal”, kompania shtetërore saudite Maaden ka ngritur në një kohë shumë të shkurtër një flotë prej rreth 3.500 kamionësh që qarkullojnë çdo ditë nëpër vend, duke transportuar mallra nga Gjiri Persik drejt Detit të Kuq.

Çdo automjet operon me dy shoferë dhe në shumë raste funksionon pothuajse pa ndërprerje. Rritja e kapaciteteve ka qenë e shpejtë: nga rreth 600 kamionë në fillim të majit, numri u rrit në 1.600, më pas 2.000 dhe brenda dy javësh arriti në 3.500. Autoritetet dhe operatorët logjistikë janë mobilizuar gjithashtu për të përdorur linja tokësore dhe hekurudhore për transportin e plehrave kimike, në përpjekje për të shmangur ndërprerjen e zinxhirëve globalë të furnizimit.

Ekspertët e industrisë e kanë cilësuar këtë si një “mrekulli logjistike”, edhe pse theksojnë se transporti tokësor nuk mund të zëvendësojë plotësisht kapacitetin e anijeve gjigante të mallrave. Megjithatë, kjo zgjidhje po ndihmon në zbutjen e mungesës globale të plehrave kimike dhe në shmangien e një krize më të gjerë ushqimore.

Ndikimi është ndjerë edhe në porte të rajonit, veçanërisht në Khor Fakkan në Gjirin e Omanit, ku volumet e ngarkesave janë rritur ndjeshëm. Raportohet se numri i kamionëve që mbërrijnë në port është rritur nga rreth 100 në ditë në afro 7.000, ndërsa përpunimi javor i kontejnerëve ka kaluar nga 2.000 në rreth 50.000.

Në kushte emergjente, Maaden dhe operatorë të tjerë kanë ngritur magazina të përkohshme dhe sisteme të reja transporti, përfshirë tubacione të posaçme për lëndët kimike të rrezikshme që përdoren në prodhimin e plehrave. Pavarësisht kostove të larta dhe joefikasitetit ekonomik të këtij modeli transporti, rritja e çmimeve në tregun global po e bën atë ende të qëndrueshëm për momentin.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)