Siria zhduk Asadin dhe nga kartëmonedhat e vendit

Presidenti i Sirisë, Ahmed al-Sharaa, zbuloi kartëmonedhat e reja të vendit gjatë një ceremonie në Damask, ku janë hequr imazhet e ish-udhëheqësit Bashar al-Assad dhe babait të tij, Hafez al-Assad.

Ky ndryshim simbolizon një distancim nga e kaluara politike dhe një përpjekje për të krijuar një identitet të ri kombëtar.

Kartëmonedhat e reja, që do të hyjnë në qarkullim më 1 janar, do të kenë vlera 10, 25, 50, 100, 200 dhe 500 funte siriane, pas heqjes së dy zerove nga kartëmonedhat ekzistuese. Dizajni i ri fokusohet te simbolet bujqësore të vendit, përfshirë trëndafilat, grurin, ullinjtë, portokallet dhe manashët.

Al-Sharaa deklaroi se këto ndryshime nuk tregojnë rimëkëmbje ekonomike, por do të lehtësojnë transaksionet ditore dhe shprehin aspiratat e popullit sirian për një fazë të re.

Guvernatori i Bankës Qendrore, Abdul Qader Hosriya, tha se procesi i këmbimit të monedhave do të përfundojë brenda 90 ditëve, me mundësi zgjatjeje. Al-Sharaa bëri thirrje për qetësi dhe shmangie të nxitimit për shkëmbimin e kartëmonedhave të vjetra, duke theksuar se përmirësimi ekonomik kërkon rritje prodhimi, ulje të papunësisë dhe forcim të sistemit bankar.

Kartëmonedhat e reja shënojnë një hap simbolik drejt identitetit të ri kombëtar dhe largimin nga nderimi i individëve në pushtet.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)