Pamje apokaliptike, hiri vullkanik mbulon shtëpitë, evakuohen 300 familje

Një situatë alarmi është krijuar në Filipine, ku mbi 300 familje janë detyruar të evakuohen pas përhapjes së madhe të hirit vullkanik nga vullkani Majon, një nga më aktivët në vend.

Sipas autoriteteve, fenomeni nuk erdhi si pasojë e një shpërthimi të fuqishëm, por nga shembja e papritur e depozitave të lavës në shpatin jugperëndimor të vullkanit. Drejtori i Institutit të Vullkanologjisë dhe Sizmologjisë së Filipineve, Teresito Bacolcol, bëri të ditur se masa të mëdha guri të nxehtë, hiri dhe gaze u rrëzuan në formë orteku pak para perëndimit të diellit të shtunën.

Megjithëse nuk raportohet për viktima apo të plagosur, pasojat kanë qenë të konsiderueshme. Re të dendura hiri janë përhapur në 87 fshatra në tre qytete, duke shkaktuar panik te banorët dhe duke vështirësuar qarkullimin për shkak të uljes së dukshmërisë në rrugë.

Foto: AP/ Nehemiah Manzanilla Sitiar

Kryebashkiaku i qytetit Kamalig, Kaloy Baldo, deklaroi se situata ishte kritike për shkak të dendësisë së hirit. “Hiri ishte aq i dendur sa nuk shihej asgjë në rrugën kombëtare. Disa banorë u panikuan, por u kërkuam të qëndronin të qetë”, u shpreh ai. Sipas tij, janë dëmtuar edhe kultura bujqësore, ndërsa kanë ngordhur edhe shumë krerë bagëti.

Autoritetet kanë ngritur nivelin e alarmit për vullkanin Majon në nivelin 3 nga 5, që sinjalizon rrezik të lartë për aktivitete të mëtejshme vullkanike, përfshirë rrjedhje piroklastike dhe shembje të tjera të materialeve të nxehta.

Megjithëse situata aktualisht është më e qetë, ekspertët paralajmërojnë se rreziku mbetet dhe monitorimi i aktivitetit të vullkanit vijon në mënyrë të pandërprerë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)