U transportuan në kushte çnjerëzore, gjenden 4 emigrantë të vdekur në Kroaci, 2 të tjerë në gjendje të rëndë

Një ngjarje e rëndë ka ndodhur në Kroaci, ku katër emigrantë janë gjetur të pajetë, ndërsa dy të tjerë ndodhen në gjendje të rëndë shëndetësore, pas dyshimeve se janë transportuar në kushte çnjerëzore.

Ngjarja ka ndodhur në zonën Donje Prilišće, pranë Netretićit, ku policia mbërriti pas një njoftimi të marrë rreth orës 22:30. Në vendngjarje u gjetën disa shtetas të huaj, mes tyre katër burra pa shenja jete dhe dy persona në gjendje kritike, të cilët u transportuan menjëherë në spital për ndihmë mjekësore.

Gjithashtu, pranë vendit të ngjarjes dhe ish-pikës kufitare me Slloveninë, policia identifikoi edhe 12 migrantë të tjerë. Në total, 13 persona u dërguan në Qendrën për Regjistrimin e Azilkërkuesve në Dugi Dol.

Sipas hetimeve paraprake, emigrantët janë transportuar nga një drejtues mjeti i paidentifikuar, i cili pasi i ka lënë në vendngjarje është larguar. Dëshmitë e mbledhura tregojnë se gjatë udhëtimit ata janë mbajtur në kushte të rënda dhe çnjerëzore.

Autoritetet kroate kanë nisur hetimet për veprat penale të transportit të paligjshëm të emigrantëve dhe rrezikimit të jetës së tyre. Trupat e viktimave do t’i nënshtrohen autopsisë për të përcaktuar shkaqet e sakta të vdekjes dhe identitetin e tyre.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)