VIDEO/ Me 221 pasagjerë në bord, avioni i nisur nga Italia përplaset me kamionin para se të ulej në pistë

Një incident i pazakontë ajror ka ndodhur në SHBA, ku një avion pasagjerësh është përplasur me një kamion teksa po ulej në aeroportin Newark në shtetin e New Jersey.

Fluturimi UA169 i kompanisë United Airlines, që vinte nga Venecia e Italisë, u përfshi në incident gjatë afrimit për ulje rreth orës 14:00. Pamjet e publikuara tregojnë avionin duke goditur një mjet transporti dhe një shtyllë ndriçimi mbi autostradën e ngarkuar New Jersey Turnpike.

Sipas të dhënave, në bord ndodheshin 221 pasagjerë dhe 10 anëtarë ekuipazhi. Pavarësisht përplasjes, avioni arriti të ulej në mënyrë të sigurt dhe nuk raportohet për të lënduar mes pasagjerëve apo ekuipazhit.

Autoritetet konfirmuan se edhe drejtuesi i kamionit shpëtoi pa dëmtime serioze, duke pësuar vetëm disa prerje të lehta dhe u largua nga spitali pas trajtimit.

Kompania ajrore deklaroi se avioni ka pasur kontakt me një shtyllë ndriçimi gjatë uljes, ndërsa hetimet për përplasjen me kamionin janë në vijim. Administrata Federale e Aviacionit në SHBA ka nisur një hetim për të përcaktuar shkaqet e sakta të incidentit.

Guvernatorja e New Jersey, Mikie Sherrill, u shpreh se është informuar për ngjarjen dhe theksoi rëndësinë e faktit që nuk pati viktima.

Autoritetet po analizojnë rrethanat, ndërsa kompania ajrore ka nisur kontrollin teknik për të vlerësuar dëmet në avion.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)