Zbulohet piktura në shpellë më e vjetër në botë, është gati 68 mijë vjeçare

Një pikturë në shpellë e zbuluar në Indonezi, daton afërsisht 67,800 vjet dhe konsiderohet si vepra artistike më e vjetër në botë. Zbulimi është konfirmuar prej studimit të kryer nga Agjencia Kombëtare Indoneziane për Kërkimin dhe Inovacionin, në bashkëpunim me Universitetin australian “Griffith”.

Piktura u gjet në vitin 2015 në shpellën Metanduno, në ishullin Muna i cili ndodhet në Indonezinë qendrore. Ajo është realizuar duke hedhur pigment mbi dorë, e cila ka lënë përjetësisht gjurmët mbi gurin e shpellës. Sipas studiuesve, më pas figura është përpunuar duke ngushtuar formën e gishtërinjve, për të krijuar përshtypjen e një dore me formë kthetre.

Data kur është realizuar vepra u konfirmua përmes analizës së depozitimeve të karbonatit të kalciumit, duke bërë krahasimin mes dendësisë mbi dhe nën sipërfaqen e pikturës. Metoda u aplikua edhe në piktura të tjera të shpellës dhe tregoi se vendi është përdorur për krijimtari artistike për një periudhë jashtëzakonisht të gjatë, të realizuara nga të paktën 35 mijë vjet më parë, deri më rreth 20 mijë vjet më parë.

Sipas Adam Brumm, një nga bashkautorët e studimit, piktura mund të simbolizojë idenë e një lidhje të ngushtë mes njerëzve dhe kafshëve. Një koncept i tillë shfaqet edhe në artin prehistorik të ishullit Sulawesi, ku janë gjetur skena me figura që përzihen mes njerëzores dhe shtazores.

Në të njëjtin rajon janë zbuluar edhe më parë piktura shumë të hershme në gurë. Në shpellën Leang Tedongnge, në vitin 2017, u gjet një pikturë e një derri, e cila daton në rreth 45 mijë vjet më parë dhe që deri më tani cilësohej si forma më e vjetër e artit në histori. Këto zbulime tregojnë se njerëzit e hershëm, të cilët kaluan nga Azia juglindore drejt Australisë, zotëronin aftësi të zhvilluara simbolike.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)