Skenari ekstrem i shkencëtarëve: Popullsia e botës mund të përgjysmohet deri në vitin 2064

Popullsia globale, që aktualisht ka arritur në rreth 8.3 miliardë banorë, mund të përballet me një rënie dramatike brenda katër dekadave të ardhshme, paralajmërojnë shkencëtarët italianë në një studim të ri alarmues.

Sipas kërkimit të publikuar në revistën shkencore Chaos, Solitons & Fractals, në një skenar ekstrem njerëzimi mund të përgjysmohet deri në vitin 2064 për shkak të krizave të mëdha globale.

Studiuesit nga Universiteti i Milanos analizuan rreth 12 mijë vite të zhvillimit të popullsisë njerëzore dhe krijuan një model matematikor për të kuptuar se si mund të evoluojë njerëzimi në të ardhmen.

Sipas tyre, katastrofa klimatike, pandemitë, konfliktet globale dhe mungesa e burimeve natyrore mund të çojnë në një ulje drastike të kapacitetit të Tokës për të mbajtur popullsinë aktuale. Në skenarin më të keq, planeti do të ishte në gjendje të mbështeste vetëm rreth 2 miliardë njerëz.

Shkencëtarët theksojnë se ky nuk është një parashikim i sigurt, por një model teorik që tregon sa e ndjeshme mund të jetë popullsia njerëzore ndaj ndryshimeve të papritura globale.

Studimi rikthen gjithashtu në vëmendje teorinë e famshme të “fundit të botës” të vitit 1960, sipas së cilës popullsia do të arrinte një pikë kritike në nëntor të vitit 2026. Megjithatë, autorët thonë se rënia e lindshmërisë në shumë vende ka shmangur një skenar të tillë ekstrem.

Ekspertët paralajmërojnë se normat gjithnjë e më të ulëta të lindjeve në shumë shtete mund të krijojnë probleme serioze ekonomike dhe sociale, pasi do të ketë më pak të rinj për të punuar, paguar taksa dhe mbështetur popullsinë në plakje.

Sipas studimeve të fundit, për të shmangur tkurrjen afatgjatë të popullsisë, norma e lindshmërisë duhet të jetë rreth 2.7 fëmijë për grua, shumë më lart se nivelet aktuale në shumicën e vendeve të zhvilluara.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)