Rezultatet e zgjedhjeve, PDK: Të shpallen të pavlefshme 20 mijë vota të diasporës

Partia Demokratike e Kosovës ka kërkuar zyrtarisht shfuqizimin e rreth 20 mijë votave të dërguara me postë nga diaspora për zgjedhjet e parakohshme parlamentare të 28 dhjetorit.

Sipas ankimimit të depozituar nga PDK në  Panelin Zgjedhor për Ankesa dhe Parashtresa këto fletëvotime nga jashtë vendit kanë mbërritur në Kosovë pas afatit të lejuar ligjor dhe për këtë arsye nuk duhet të pranohen për numërim.

Ditë më parë, zëdhënësi i Komisionit Qendror të Zgjedhjeve, Valmir Elezi, konfirmoi se KQZ kishte pranuar rreth 20 mijë pako me fletëvotime në fillim të janarit.

Ligji për Zgjedhjet në Kosovë parasheh që votat e dërguara me postë nga jashtë vendit të pranohen nga KQZ deri një ditë pas zgjedhjeve, me kusht që të kenë vulën e dërgimit para ditës së votimit.

Anëtari i PDK-së në KQZ, Ilir Gashi, ka deklaruar se pranimi i këtyre votave është bërë me vetëdije për shkeljen ligjore. Ndërkohë, Lëvizja Vetëvendosje, e cila fitoi bindshëm zgjedhjet, e ka cilësuar ankesën e PDK si sulm ndaj diasporës.

Aktualisht, KQZ është në fazën përfundimtare të numërimit të votave me postë, para shpalljes së rezultateve përfundimtare të zgjedhjeve.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)