Raundi i parë për presidentin në Kosovë, Rushiti siguron 63 vota, seanca vijon të martën

Raundi i parë i votimit në Kuvend për zgjedhjen e Presidentit të ri të Kosovës ka përfunduar pa një rezultat përfundimtar.

Në seancën plenare, deputetët e mazhorancës votuan për kandidaten e propozuar nga Vetëvendosje, Feride Rushiti, e cila arriti të sigurojë 63 vota. Në votim morën pjesë 64 deputetë, ndërsa një votë u shpall e pavlefshme. Ndërkohë, kandidatja tjetër e propozuar, Hatixhe Hoxha, nuk arriti të marrë asnjë votë në këtë raund.

Për shkak të mungesës së votave të nevojshme për zgjedhje, seanca u shty për ditën e nesërme në orën 10:00, kur pritet të zhvillohet raundi i radhës i votimit.

Feride Rushiti është një figurë e njohur në fushën e të drejtave të njeriut, si themeluese dhe drejtuese e Qendrës Kosovare për Rehabilitimin e të Mbijetuarve të Torturës. Organizata e saj është angazhuar prej vitesh në mbështetjen e viktimave dhe promovimin e të drejtave të njeriut në Kosovë.

Në vitin 2025, ajo u nominua për Çmimin Nobel për Paqe, ndërsa më herët, në vitin 2018, është nderuar me Çmimin për Guximin e Gruas, për kontributin e saj në mbrojtjen e të drejtave dhe rehabilitimin e të mbijetuarve të torturës.

Procesi i votimit pritet të vijojë nesër, ndërsa mbetet për t’u parë nëse Kuvendi do të arrijë të zgjedhë kreun e ri të shtetit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)