Lufta në Lindjen e Mesme, rreth 3000 shqiptarë në rajon, ministri i Jashtëm zbulon sa kanë kërkuar të largohen

Ministri i Jashtëm, Ferit Hoxha ka raportuar sot në Komisionin Parlamentar për Evropën dhe Punët e Jashtme mbi situatën e shtetasve shqiptarë që ndodhen në zonat e konfliktit në Lindjen e Mesme, duke zbuluar edhe masat e ndërmarra nga institucionet shqiptare.

“Më lejoni të bëj një përmbledhje statistikore mbi numrin e shtetasve tanë në rajon: rezidentë janë 2.962 shtetas shqiptarë në rajon në fillim të konfliktit, ndërsa me qëndrim të përkohshëm janë 543 shtetas. Këta janë udhëtarë”, deklaroi ministri gjatë raportimit në komision.

Ai bëri të ditur se ambasadat shqiptare kanë arritur të kontaktojnë një pjesë shumë të madhe të tyre. “Të kontaktuar nga ambasadat individualisht, një për një, emër për emër, janë 2.511 shtetas, që përbëjnë rreth 85% të totalit”, tha Hoxha.

Sipas të dhënave të paraqitura, 138 shtetas shqiptarë kanë shprehur interes për t’u larguar nga zona e konfliktit, ndërsa 703 qytetarë janë asistuar ose udhëzuar për t’u larguar në forma të ndryshme.

Ministri sqaroi gjithashtu se një pjesë e qytetarëve kanë arritur të largohen individualisht.

“Të larguar individualisht janë përafërsisht 24 shtetas, ndërsa 45 të tjerë janë të planifikuar të largohen individualisht sipas kanaleve dhe mënyrave të sigurta të transportit”, u shpreh ai.

Ndërkohë, një numër i vogël qytetarësh është evakuuar me ndihmën e shteteve partnere.

“Qytetarët që janë evakuuar me asistencën e shteteve të treta janë 17 shtetas. Është praktikë që kur një shtet që ka mundësi më shumë organizon lëvizjen e shtetasve të vet dhe, kur ka vende të lira, ndihmon edhe shtetas të vendeve të tjera”, tha ministri Hoxha.

Autoritetet shqiptare kanë bërë të ditur se kontaktet me qytetarët në rajon vijojnë dhe se ambasadat po ndjekin nga afër çdo rast për të garantuar sigurinë dhe mundësitë e largimit nga vendet e Gjirit, për ata që e kërkojnë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)